കൊച്ചി വാട്ടർ മെട്രോ, മട്ടാഞ്ചേരി, വില്ലിങ്ഡൺ ഐലൻഡ് ടെർമിനലുകൾ മുഖ്യമന്ത്രി ഉദ്‌ഘാടനം ചെയ്തു .

 
കൊച്ചി: കൊച്ചി വാട്ടർ മെട്രോയുടെ പുതിയ രണ്ട് ടെർമിനലുകളുടെ ഉദ്ഘാടനം മുഖ്യമന്ത്രി പിണറായി വിജയൻ നിർവഹിച്ചു.

കൊച്ചി വാട്ടർ മെട്രോ ലോക ശ്രദ്ധ ആകർഷിച്ചെന്ന് മുഖ്യമന്ത്രി പറഞ്ഞു. 38 കോടി രൂപ ചെലവിലാണ് രണ്ട് ടെർമിനലുകളും പണികഴിപ്പിച്ചത്. ഇതോടെ വാട്ടർ മെട്രോ ടെർമിനലുകളുടെ എണ്ണം 12 ആയി.

29 മാസങ്ങൾക്കുള്ളിൽ 50 ലക്ഷം യാത്രക്കാർ എന്ന നേട്ടമാണ് കൊച്ചി മെട്രോ സ്വന്തമാക്കിയത് .പൈതൃക സമ്പത്ത് സംരക്ഷണത്തിൻ്റെ ഭാഗമായി രണ്ട് ടെർമിനലുകളും പൂർണമായും വെള്ളത്തിലാണ് നിർമിച്ചിരിക്കുന്നത്.

 
8000 ചതുരശ്രയടി വലിപ്പമുള്ള മട്ടാഞ്ചേരി ടെർമിനൽ പൈതൃകമുറങ്ങുന്ന ഡച്ച് പാലസിന് തൊട്ടടുത്താണ്. പഴയ ഫെറി ടെർമിനലിന് അടുത്താണ് 3000 ചതുരശ്രയടി വിസ്തീർണമുള്ള വില്ലിങ്ഡൺ ഐലൻഡ് ടെർമിനൽ.

 മട്ടാഞ്ചേരിയിലെയും വില്ലിങ്ഡൺ ഐലൻഡിൻ്റെയും ചരിത്ര പൈതൃകത്തിന് ചേർന്ന നിർമാണ രീതിയാണ് അവലംബിച്ചിരിക്കുന്നത്. വൃക്ഷങ്ങളും പച്ചപ്പും അതേപടി നിലനിർത്തിയാണ് ടെർമിനൽ നിർമാണം പൂർത്തിയാക്കിയത്.

രണ്ട് പ്രദേശത്തെയും വാണിജ്യ, ബിസിനസ്, ടൂറിസം വികസനത്തിന് വാട്ടർ മെട്രോയുടെ വരവ് ഊർജം പകരും.

 50 ലക്ഷം യാത്രക്കാർ എന്ന ചരിത്രനേട്ടം സ്വന്തമാക്കിയാണ് കൊച്ചിയുടെ സ്വന്തം വാട്ടർ മെട്രോ പുതിയ രണ്ട് ഇടങ്ങളിലേക്ക് കൂടിയെത്തുന്നത്. പ്രവർത്തനം തുടങ്ങി 29 മാസങ്ങൾക്കുള്ളിലാണ് യാത്രക്കാരുടെ എണ്ണത്തിലും വിപുലീകരണത്തിലും അഭിമാനകരമായ നേട്ടം കൈവരിക്കുന്നത്.

 ഒരു ലൈറ്റ് ട്രാൻസ്‌പോർട്ട് പ്രോജക്ട് ഇത്രയും ചുരുങ്ങിയ കാലയളവ് കൊണ്ട് ഇത്രയേറെ യാത്രക്കാരെ സ്വന്തമാക്കുന്നത് അപൂർവമാണ്.

കൊച്ചി വാട്ടർ മെട്രോയുടെ മികച്ച യാത്രാനുഭവമാണ് ചുരുങ്ങിയ കാലംകൊണ്ട് ഇത്രയധികം യാത്രക്കാരെ ആകർഷിച്ചതെന്ന് ലോക്നാഥ് ബെഹ്റ പറഞ്ഞു.

2023 ഏപ്രിൽ 25നാണ് കേരള സർക്കാരിൻ്റെ ഈ സ്വപ്ന പദ്ധതി സർവീസ് ആരംഭിച്ചത്.

 ദ്വീപ് നിവാസികൾക്ക് മാത്രമല്ല, കൊച്ചിയിലെത്തുന്ന വിനോദസഞ്ചാരികൾക്കും പ്രമുഖർക്കും വാട്ടർ മെട്രോ ഒരു ആകർഷണമായി മാറിയിട്ടുണ്ട്. കൊച്ചിയിൽനിന്ന് ദേശീയതലത്തിലേക്ക് ഈ പദ്ധതിയുടെ മികവ് വ്യാപിച്ചു.