കോണ്‍ഗ്രസിന്‍റെ വിശ്വാസ സംരക്ഷണ മേഖല ജാഥകള്‍ക്ക് ഇന്ന് തുടക്കം,നാലിടങ്ങളിൽ നിന്നായി നയിക്കുന്നത് നാലു നേതാക്കള്‍

തിരുവനന്തപുരം  : ശബരിമലയിൽ സ്വർണം കളവ് പോയ സംഭവത്തിൽ സിബിഐ അന്വേഷണം ആവശ്യപ്പെട്ടും ദേവസ്വം മന്ത്രിയേയും തിരുവിതാംകൂർ ദേവസ്വം ബോർഡ് പ്രസിഡൻ്റിനേയും പുറത്താക്കണമെന്നാവശ്യപ്പെട്ടും കെ പി സി സി യുടെ നേതൃത്വത്തിൽ നടക്കുന്ന മേഖലാ വിശ്വാസ സംരക്ഷണ  യാത്രയ്ക്ക് ഇന്ന് തുടക്കമാകും .

ശബരിമലയുടെ ആചാരവും വിശ്വാസവും സംരക്ഷിക്കണമെന്നും ദേവസ്വം സ്വത്തുവകകൾ മോഷ്ടിച്ചവരെ കണ്ടെത്തി ശിക്ഷിക്കണമെന്നും ആവശ്യപ്പെട്ടാണ് ജാഥ. പാലക്കാട്,കാസർകോഡ്, തിരുവനന്തപുരം എന്നിവിടങ്ങളിൽ ഇന്ന് ജാഥ തുടങ്ങും.

 നാളെ മൂവാറ്റുപുഴയിൽ നിന്നും ജാഥ ആരംഭിക്കും. വെള്ളിയാഴ്ച നാലു ജാഥകളും ചെങ്ങന്നൂരിൽ സംഗമിച്ച ശേഷം 18ന് പന്തളത്ത് സമാപിക്കും.

പാലക്കാട് നിന്ന് കൊടിക്കുന്നിൽ സുരേഷ് എംപിയും കാസർകോട് നിന്ന് കെ.മുരളീധരനും തിരുവനന്തപുരത്ത് നിന്ന് യുഡിഎഫ് കൺവീനർ അടൂർ പ്രകാശ് എംപിയും ജാഥ നയിക്കും.

മൂവാറ്റുപുഴയിൽ നിന്ന് ബെന്നി ബഹ്നാൻ എംപിയാണ് ജാഥ നയിക്കുന്നത്. കെപിസിസി പ്രസിഡന്റും പ്രതിപക്ഷ നേതാവും അടക്കമുള്ളവർജാഥ ഉദ്ഘാടനം ചെയ്യും.