പത്താം ക്ലാസുകാരിക്ക് നായ്ക്കുരണ പൊടി പ്രയോഗം: മൂന്ന് അധ്യാപകരെ സസ്‌പെന്റ് ചെയ്തു

തൃക്കാക്കര:  കാക്കനാട് ഗവ. സ്കൂൾ വിദ്യാർത്ഥിനിക്ക് നേരെ നായ്കുരണപ്പൊടി പ്രയോഗം നടത്തിയ സംഭവത്തിൽ മൂന്ന് അധ്യാപകരെ സസ്‌പെന്റ് ചെയ്തു. അധ്യാപകരായ ശ്രീകാന്ത്, ജിഷ ജോസഫ് ,ദീപ എന്നിവരെയാണ്  വിദ്യാഭ്യാസ ഡപ്യൂട്ടി ഡയറക്ടർ ഹണി  ജെ അലക്‌സാണ്ടർ സസ്‌പെന്റ് ചെയ്‍തത്. മറ്റൊരു അധ്യാപികയായ രാജിയെ സ്ഥലം മാറ്റി.തിരുമാറാടി സ്കൂളിലേക്കാണ് സ്ഥലം മാറ്റിയത്.വിദ്യാർത്ഥിനിക്ക് നേരെ നായ്കുരണപ്പൊടി പ്രയോഗം നടത്തിയ സംഭവത്തിൽ വിദ്യാഭ്യാസ വകുപ്പ് അന്വേഷണത്തിൽ അധ്യാപകരുടെ ഭാഗത്ത് നിന്നും വീഴ്ച വന്നതായി കണ്ടെത്തിയതിന്റെ അടിസ്ഥാനത്തിലാണ് നടപടിയെന്ന് വിദ്യാഭ്യാസ ഡപ്യൂട്ടി ഡയറക്ടർ പറഞ്ഞു.തെങ്ങോട് ഗവ. സ്കൂൾ വിദ്യാർത്ഥിനിക്ക് നേരെ നായ്കുരണപ്പൊടി പ്രയോഗം നടത്തിയ സംഭവത്തിൽ സ്‌കൂളിലെ അധ്യാപകർ ഉൾപ്പടെ എട്ടുപേർക്കെതിരെ ജാമ്യമില്ലാ വകുപ്പ് പ്രകാരം ഇൻഫോപാർക്ക് പോലീസ് കേസ് എടുത്തതിന് പിന്നാലെയാണ് നടപടി. അധ്യാപകരായ ശ്രീകാന്ത്, ജിഷ ജോസഫ്  എന്നിവരുൾപ്പെടെ എട്ടുപേർക്കെതിരെയാണ് പോലീസ് കേസ് എടുത്തത്. വിദ്യാർത്ഥിനിയുടെയും ,മാതാവിന്റെയും മൊഴിയുടെ അടിസ്ഥാനത്തിൽ ജുവനൈൽ ജസ്റ്റിസ് നിയമ പ്രകാരവും,ഭാരതീയ ന്യായ  സംഹിത പ്രകാരവും ഇൻഫോപാർക്ക് പോലീസ് കേസ് എടുത്തിരിക്കുന്നത്.ഇവരെ കൂടാതെ ആറുവിദ്ധ്യാർത്ഥികളും കേസിൽ ഉൾപ്പെടുന്നു.കഴിഞ്ഞ ഫെബ്രുവരി 3നായിരുന്നു സംഭവം നടന്നത്. ഉപദ്രവിക്കണമെന്ന ലക്ഷ്യത്തോടെ നായ്ക്കുരണ സ്കൂളിൽ കൊണ്ടുവരുകയും, പത്താം ക്ലാസ് വിദ്യാർത്ഥിനിയുടെ ശരീരത്തിൽ ഇട്ട  സംഭവത്തിൽ സ്കൂളിലെ നാല്  വിദ്യാർത്ഥികൾക്കെതിരെയും,. സ്കൂളിൽ ഡെസ്ക് കൊണ്ട് പെൺകുട്ടിയെ സ്ഥിരമായി ഇടിക്കാറുണ്ടെന്ന പരാതിയിൽ സ്കൂളിലെ മറ്റ് രണ്ട്  വിദ്ധാർത്ഥികൾക്കെതിരെയും കേസ് എടുത്തിട്ടുണ്ട്.