കനല്‍വഴികളിലൂടെയുള്ള ദീര്‍ഘയാത്ര

ഇന്ത്യന്‍ രാഷ്ട്രീയത്തില്‍, പ്രത്യേകിച്ച് കേരളത്തിനകത്ത് ഇത്രയധികം ജനക്കൂട്ടത്തെ ആകര്‍ഷിക്കുന്ന നേതാക്കള്‍ ചുരുക്കമേയുള്ളൂ. വന്‍ ജനക്കൂട്ടത്തെ ആകര്‍ഷിക്കാനും സാധാരണക്കാരുമായി സംവദിക്കാനുമുള്ള കഴിവ് ഒരു നേതാവെന്നനിലയില്‍ അദ്ദേഹത്തിന്റെ ഏറ്റവും പ്രധാന സവിശേഷതയാണ്. ഇതിനുകാരണങ്ങള്‍ പലതാണ്. തൊഴിലാളികള്‍, കര്‍ഷകര്‍, തൊഴില്‍രഹിതര്‍, പാര്‍ശ്വവത്കരിക്കപ്പെട്ടവര്‍ എന്നിങ്ങനെ സാധാരണക്കാരുടെ ദൈനംദിനപ്രശ്‌നങ്ങളുമായി ബന്ധപ്പെടാന്‍ വി.എസിന് അസാധാരണമായ കഴിവുണ്ടായിരുന്നു. ഒരു കമ്യൂണിസ്റ്റ് എന്ന നിലയിലുള്ള ലളിതമായ ജീവിതം അദ്ദേഹത്തെ പൊതുജനങ്ങള്‍ക്ക് പ്രിയപ്പെട്ടവനാക്കി.

വി.എസിന്റെ പ്രസംഗപാടവം ജനങ്ങളെ അണിനിരത്തുന്നതില്‍ നിര്‍ണായകമായിരുന്നു. വ്യക്തതയോടും കണിശമായും അദ്ദേഹം സംസാരിച്ചു. പലപ്പോഴും നര്‍മത്തോടെ സംസാരിച്ചു. അത് അദ്ദേഹത്തിന്റെ പ്രസംഗങ്ങളെ ആകര്‍ഷകവും അവിസ്മരണീയവുമാക്കി. അദ്ദേഹം പ്രസംഗങ്ങളിലൂടെ അഴിമതി, സാമൂഹിക അസമത്വങ്ങള്‍, വരേണ്യവര്‍ഗത്തിന്റെ അധികാരം എന്നിവയെ ശക്തമായി വിമര്‍ശിച്ചു.
മാര്‍ക്‌സിസ്റ്റ് പ്രത്യയശാസ്ത്രത്തില്‍ വി.എസ്. എന്നും സ്ഥിരതപുലര്‍ത്തി. തൊഴിലാളികളുടെയും കര്‍ഷകരുടെയും പാവപ്പെട്ടവരുടെയും അവകാശങ്ങള്‍ക്കായി ഉറച്ചുനിന്നു. സോഷ്യലിസത്തോടുള്ള അചഞ്ചലമായ പ്രതിബദ്ധത അദ്ദേഹത്തിന്റെ പൊതു വ്യക്തിത്വത്തിന്റെ മുഖമുദ്രയായിരുന്നു. ഈ പ്രത്യയശാസ്ത്ര വ്യക്തതയും ദൃഢതയും അദ്ദേഹത്തെ ബഹുജനങ്ങള്‍ വിശ്വസിക്കുന്ന നേതാവാക്കി.

കനല്‍വഴികളിലൂടെയുള്ള ദീര്‍ഘയാത്ര അദ്ദേഹത്തെ ഔന്നത്യങ്ങളിലെത്തിച്ചു. അത് ഒരു വിസ്മയമാണ്. അതിന്റെ അടിസ്ഥാനം ജനങ്ങള്‍ വാരിക്കോരിക്കൊടുത്ത ആദരവും സ്‌നേഹവുമാണ്. പാരമ്പര്യത്തിന്റെ മേലങ്കിയില്ലാത്ത വി.എസ്. അധ്വാനത്തിന്റെ കറകളഞ്ഞ പാരമ്പര്യമാണ് എന്നും ഉയര്‍ത്തിപ്പിടിച്ചത്. ഒരു ഘട്ടത്തിലും പതറിയില്ല. സ്വഭാവഹത്യകള്‍, കെട്ടിച്ചമച്ച ആരോപണങ്ങള്‍ എത്രയെത്ര! പ്രതിയോഗികളെപ്പോലും ആശ്ചര്യപ്പെടുത്തുന്നതായിരുന്നു ചക്രവ്യൂഹങ്ങളെ ഭേദിച്ച് പുറത്തുവന്ന വി.എസ്. ആ വ്യക്തിത്വത്തിന്റെ സവിശേഷത നിലയ്ക്കാത്ത സമരബോധവും പ്രശാന്തമായ സുതാര്യതയുമാണ്.