/kalakaumudi/media/agency_attachments/zz0aZgq8g5bK7UEc9Bb2.png)
/kalakaumudi/media/member_avatars/2025/01/24/2025-01-24t111056647z-bijuks.png )
/kalakaumudi/media/media_files/2025/07/26/govindan-2025-07-26-14-23-09.jpg)
തിരുവനന്തപുരം: കണ്ണൂര് സെന്ട്രല് ജയിലില് നിന്ന് തടവുകാരന് ഗോവിന്ദച്ചാമി ചാടിപ്പോയ സംഭവത്തെക്കുറിച്ച് പ്രത്യേക അന്വേഷണത്തിന് മുഖ്യമന്ത്രി പിണറായി വിജയന് നിര്ദേശം നല്കി. കേരള ഹൈക്കോടതി മുന് ജഡ്ജി ജസ്റ്റിസ് (റിട്ട.) സി.എന്. രാമചന്ദ്രന് നായര്, മുന് സംസ്ഥാന പൊലീസ് മേധാവി ജേക്കബ് പുന്നൂസ് എന്നിവരാണ് പ്രത്യേക അന്വേഷണം നടത്തുക. നിലവില് പൊലീസ് അന്വേഷണവും വകുപ്പ് തല പരിശോധനകളും നടക്കുന്നുണ്ട്. ഇതിനു പുറമെയാണ് പ്രത്യേക അന്വേഷണം.
കണ്ണൂരിലെ സംഭവത്തിന്റെ പശ്ചാത്തലത്തില് മുഖ്യമന്ത്രി വിളിച്ച ഉന്നതതല യോഗത്തിലാണ് പ്രത്യേക അന്വേഷണം അടക്കമുള്ള കാര്യങ്ങളില് തീരുമാനമെടുത്തത്. കണ്ണൂര് സെന്ട്രല് ജയിലില് ഉണ്ടായത് അത്യന്തം ഗൗരവമുള്ളതും വിശദമായ പരിശോധന നടത്തി നടപടി സ്വീകരിക്കേണ്ടതുമായ സംഭവമാണെന്നും മുഖ്യമന്ത്രി യോഗത്തില് പറഞ്ഞു.
അടുത്ത മൂന്നു മാസത്തിനകം സംസ്ഥാനത്തെ പ്രധാനപ്പെട്ട നാലു ജയിലുകളിലും വൈദ്യുതി ഫെന്സിങ് പൂര്ണതോതില് പ്രവര്ത്തനക്ഷമമാക്കണമെന്ന് തീരുമാനമെടുത്തു. സൂക്ഷ്മതലത്തില് ദൃശ്യങ്ങള് പകര്ത്താന് കഴിയുന്ന ഇന്റലിജന്ഡ് സിസിടിവി നാലു പ്രധാന ജയിലുകളില് സ്ഥാപിക്കും. ഇതിനുള്ള നടപടി അടിയന്തരമായി തുടങ്ങും.
ജയില് ജീവനക്കാര് തുടര്ച്ചയായി ഒരേ സ്ഥലത്ത് തുടരുന്നത് കണക്കിലെടുത്ത്, അതുമൂലം ഉണ്ടാകുന്ന പ്രശ്നങ്ങള് ഒഴിവാക്കാന് ഓരോ സ്ഥലത്തും അഞ്ചുവര്ഷം പൂര്ത്തിയാക്കിയവരെ മറ്റിടങ്ങളിലേക്ക് മാറ്റും. ജയിലിനകത്ത് ഇന്റലിജന്സ് പ്രവര്ത്തനങ്ങള് ശക്തിപ്പെടുത്തും. ശിക്ഷിക്കപ്പെട്ട കൊടും ക്രിമിനലുകളില് പലരെയും ഇപ്പോള് അതീവ സുരക്ഷാ ജയിലിലാണ് പാര്പ്പിക്കുന്നത്. ഇത്തരക്കാര്ക്ക് അന്തര് സംസ്ഥാന ജയില് മാറ്റം കൂടി ആലോചിക്കും.
ജയിലുകളിലെ വിഡിയോ കോണ്ഫറന്സിങ് സംവിധാനം ശക്തിപ്പെടുത്താനുള്ള നടപടികള് സ്വീകരിക്കും. ജയിലിനകത്ത് തടവുകാര്ക്ക് ലഭ്യമാകുന്ന സൗകര്യങ്ങള് വര്ധിപ്പിക്കാന് നടപടി സ്വീകരിക്കും. താങ്ങാനാവുന്നതില് കൂടുതല് തടവുകാര് ജയിലുകളില് ഉള്ള സാഹചര്യത്തില് പുതിയ ഒരു സെന്ട്രല് ജയില് ആരംഭിക്കും. ഇതിനായി കോട്ടയം, പത്തനംതിട്ട മേഖലകളില് സ്ഥലം കണ്ടെത്താന് ശ്രമിക്കുമെന്നും യോഗം തീരുമാനമെടുത്തു.
സംസ്ഥാന ചീഫ് സെക്രട്ടറി ഡോ.എ. ജയതിലക്, പൊലീസ് മേധാവി റവാഡ ചന്ദ്രശേഖര്, ആഭ്യന്തര അഡിഷണല് ചീഫ് സെക്രട്ടറി ബിശ്വനാഥ് സിന്ഹ, പൊതുമരാമത്ത് വകുപ്പ് സെക്രട്ടറി കെ. ബിജു, ജയില് മേധാവി ബല്റാം കുമാര് ഉപാധ്യായ, ഇന്റലിജന്സ് എഡിജിപി പി. വിജയന് എന്നിവരാണ് മുഖ്യമന്ത്രി വിളിച്ച യോഗത്തില് പങ്കെടുത്തത്.