ശബരിമല സ്വർണ്ണമോഷണവുമായി ബന്ധപ്പെട്ടു 2018 മുതലുള്ള എല്ലാ ഇടപാടുകളും കൃത്യമായി അന്വേഷിക്കണമെന്ന് ഹൈക്കോടതി നിർദ്ദേശം

കൊച്ചി :ശബരിമലയിൽ നടന്ന സ്വർണ്ണമോഷണവുമായി ബന്ധപ്പെട്ടു 2018 മുതലുള്ള എല്ലാ ഇടപാടുകളും കൃത്യമായി  അന്വേഷിക്കണമെന്ന് ഹൈക്കോടതിയുടെ നിർദ്ദേശം .

വിജയ് മല്യ വാതിലിൽ പൊതിഞ്ഞ 24 കാരറ്റ് തനി തങ്കം  ഉണ്ണികൃഷ്ണൻ പോറ്റി തട്ടിയെടുത്തോയെന്നും  ശ്രീകോവിലിന്റെ വാതിൽ സ്വർണം പൂശിയതിനെപ്പറ്റിയും വളരെ വ്യക്തമായി അന്യോഷണം വേണമെന്നും നിർദ്ദേശത്തിൽ പറയുന്നുണ്ട് .

പോറ്റിയെ മുൻനിർത്തി വലിയരീതിയിൽ തട്ടിപ്പ് നടന്നിട്ടുണ്ട് .

വിലപിടിപ്പുള്ള എല്ലാത്തിന്റേയും വ്യാജ മാതൃകയുണ്ടാക്കി തട്ടിപ്പ് നടത്തിയെന്ന് സംശയമുണ്ട്.

 ശബരിമലയിലെ അമൂല്യവസ്തുക്കൾ പുറത്തേക്ക് കടത്തിയിട്ടുണ്ടോയെന്ന് അന്വേഷിക്കണമെന്ന് ഹൈക്കോടതി ദേവസ്വം ബെഞ്ച് ആവശ്യപ്പെട്ടു.

സ്വർണത്തട്ടിപ്പിന് അപ്പുറത്തേക്ക് അന്വേഷണം വ്യാപിപ്പിക്കണമെന്നും നിർദേശിച്ചു. 

ശബരിമലയിൽ നിന്നും നഷ്ടമായ സ്വർണം എത്രയാണെന്ന് കണ്ടെത്തണം. ചെന്നൈയിൽ എന്താണ് നടന്നതെന്ന് കൃത്യമായി അറിയണം.

വാതിൽപ്പാളി കൊണ്ടുപോയതിലും  ഉണ്ണികൃഷ്ണൻ പോറ്റിക്ക് പങ്കുണ്ടെന്നും കോടതി അഭിപ്രായപ്പെട്ടു.

സ്വർണക്കൊള്ളയുമായി ബന്ധപ്പെട്ട ദേവസ്വം ബോർഡിനെതിരെയും ഹൈക്കോടതി രൂക്ഷ വിമർശനം ഉന്നയിച്ചു. 

മിനിറ്റ്‌സ് ബുക്കിൽ അടിമുടി ക്രമക്കേടാണെന്ന് കോടതി നിരീക്ഷിച്ചു. മിനിറ്റ്‌സ് രേഖപ്പെടുത്തിയിട്ടുള്ളത് ക്രമരഹിതമായാണ്.

 ഗുരുതരമായ ക്രമക്കേടുകളാണ് ഉള്ളതെന്നും കോടതി വിലയിരുത്തി. സന്നിധാനത്ത് യഥേഷ്ടം വിഹരിക്കാൻ ദേവസ്വം ഉദ്യോഗസ്ഥർ ഉണ്ണികൃഷ്ണൻ പോറ്റിക്ക് അനുമതി നൽകി.

പോറ്റിക്ക് ഉദ്യോഗസ്ഥർ അമിത സ്വാതന്ത്ര്യം നൽകി. പോറ്റി നടത്തിയ പല ഇടപാടുകളിലും ദേവസ്വം ഉദ്യോഗസ്ഥർ ഒത്താശ ചെയ്തുവെന്നും കോടതി നിരീക്ഷിച്ചു.