തദ്ദേശ തെരഞ്ഞെടുപ്പിനുള്ള സ്ഥാനാര്‍ഥി പട്ടിക പുറത്തിറക്കുന്നതിനു മുമ്പേ തിരുവനന്തപുരത്തെ ബിജെപിയില്‍ രൂക്ഷമായ കലഹം

തിരുവനന്തപുരം:വരാനിരിക്കുന്ന തദ്ദേശ തെരഞ്ഞെടുപ്പിനുള്ള സ്ഥാനാർഥി പട്ടിക പ്രഖ്യാപിക്കുന്നതിന് മുൻപേ  തിരുവനന്തപുരത്തെ ബിജെപിയിൽ കലഹം രൂക്ഷമായി തുടരുന്നു .

സ്ഥാനാർഥി നിർണയത്തെച്ചൊല്ലിയുള്ള അഭിപ്രായ വ്യാത്യാസങ്ങളാണ് ഇത്തരം പ്രശ്നങ്ങളിലേക്ക് നയിച്ചത് .

ഇതേ തുടർന്ന്  ബിജെപി നേമം ഏരിയാ പ്രസിഡന്റ് എം ജയകുമാർ രാജിവെച്ചു. കഴിഞ്ഞ 43 വർഷമായി സംഘടനാ പ്രവർത്തനം നടത്തിവരികയും എന്നാൽ  തനിക്ക് പാർട്ടിയിൽ നിന്നു വേണ്ടരീതിയിൽ ഉള്ള നീതിയോ പരിഗണനയോ ലഭിച്ചിട്ടില്ലെന്നും ഇതേ തുടർന്നാണ് രാജി വെച്ചതെന്നുമാണ് ജയകുമാർ അറിയിച്ചത് .

ബിജെപി ജില്ലാ പ്രസിഡന്റ് കരമന ജയനും നേമം മണ്ഡലം പ്രസിഡന്റ് കരുമം രാജേഷിനും ചൊവ്വാഴ്ച വൈകീട്ടാണ് ജയകുമാർ രാജിക്കത്ത് നൽകിയത്.

 കഴിഞ്ഞതവണ പൊന്നുമംഗലം വാർഡിൽ നിന്നു വിജയിച്ച എം ആർ ഗോപനാണ് നേമത്ത് സ്ഥാനാർഥിയാകുക എന്ന സൂചനയാണ് രാജിക്ക് കാരണമെന്ന് റിപ്പോർട്ടുണ്ട്.

നേമം വാർഡിൽ മത്സരിക്കാൻ ആ വാർഡിലുള്ള ഒരാളെത്തന്നെ പരിഗണിക്കണമെന്ന പാർട്ടി പ്രവർത്തകരുടെ ആവശ്യം നേതൃത്വം പരിഗണിച്ചില്ലെന്നും രാജിക്കത്തിൽ ചൂണ്ടിക്കാട്ടുന്നു.

ബിജെപിയുടെ ശക്തികേന്ദ്രങ്ങളാണ് നേമം മേഖലയിലെ അഞ്ചുവാർഡുകളും. കഴിഞ്ഞതവണ എല്ലായിടത്തും ബിജെപിയാണ് വിജയിച്ചത്. 

 പൊന്നുമംഗലം സ്ത്രീ സംവരണം ആയതോടെയാണ് ഗോപന് സുരക്ഷിത മണ്ഡലം തേടുന്നത്.

തിരുവനന്തപുരം കോർപ്പറേനിലെ സ്ഥാനാർഥികളെ ബിജെപി ഇതുവരെ ഔദ്യോഗികമായി പ്രഖ്യാപിച്ചിട്ടില്ല. 

അതേസമയം ബിജെപി ജില്ലാ നേതൃത്വവും ആർഎസ്എസും നേമത്ത് ഗോപനെ പിന്തുണയ്ക്കുന്നതായി റിപ്പോർട്ടുകളുണ്ട്.

കോർപ്പറേഷനിലെ പകുതിയോളം സ്ഥാനാർഥികളുടെ പട്ടിക ബിജെപി നാളെ പ്രഖ്യാപിച്ചേക്കും. ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖറിൻ്റെ നേതൃത്വത്തിലാണ് അന്തിമ ചർച്ചകൾ നടക്കുന്നത്