/kalakaumudi/media/agency_attachments/zz0aZgq8g5bK7UEc9Bb2.png)
/kalakaumudi/media/media_files/2024/12/21/PNLVjaSqUFHTbBLLjsQ4.JPG)
ഇടുക്കി: കട്ടപ്പനയില് ആത്മഹത്യ ചെയ്ത നിക്ഷേപകന് സാബുവിനെ സഹകരണ ബാങ്ക് മുന് പ്രസിഡന്റ് ഭീഷണിപ്പെടുത്തുന്ന ഫോണ് സന്ദേശം പുറത്ത്. സിപിഎം മുന് കട്ടപ്പന ഏരിയ സെക്രട്ടറി വി ആര് സജിയാണ് ഫോണിലൂടെ സാബുവിനെ ഭീഷണിപ്പെടുത്തിയത്. താന് ബാങ്കില് പണം ചോദിച്ച് എത്തിയപ്പോള് ബാങ്ക് ജീവനക്കാരന് ബിനോയ് പിടിച്ചു തള്ളിയെന്ന് ആത്മഹത്യ ചെയ്ത സാബു ഫോണ് സംഭാഷണത്തില് പറയുന്നു. പക്ഷേ, താന് തിരിച്ച് ആക്രമിച്ചെന്ന് പറഞ്ഞ് പ്രശ്നം ഉണ്ടാക്കുകയാണെന്നും സാബു പറയുന്നുണ്ട്. അതേസമയം സാബു അടി വാങ്ങിക്കേണ്ട സമയം കഴിഞ്ഞെന്നും പണി മനസിലാക്കി തരാമെന്നുമായിരുന്നു സജി ഫോണിലൂടെ പ്രതികരിച്ചത്. സാബുവിനെ ഭീഷണിപ്പെടുത്തുന്ന ഈ സംഭാഷണം ആണ് ഇപ്പോൾ പുറത്ത് വന്നിരിക്കുന്നത്.
സംഭവത്തിൽ കട്ടപ്പന റൂറല് ഡെവലപ്പ്മെന്റ്് കോ ഓപ്പറേറ്റീവ് സൊസൈറ്റി ഭരണ സമിതി അംഗങ്ങളുടെയും ജീവനക്കാരുടെയും മൊഴി പൊലീസ് രേഖപ്പെടുത്തും. സാബു ബാങ്കില് എത്തിയ സമയത്തെ സിസിടിവി ദൃശ്യങ്ങള് ഉൾപ്പടെ പൊലീസ് ശേഖരിച്ചിട്ടുണ്ട്. ഇത് വിശദമായി പരിശോധിക്കും.
എന്നാൽ പ്രാഥമിക പരിശോധനയില് സാബുവും ജീവനക്കാരും തമ്മില് കയ്യേറ്റം ഉണ്ടായതായി കണ്ടെത്താന് കഴിഞ്ഞിട്ടില്ല. ആത്മഹത്യാക്കുറിപ്പില് പേരുള്ള ബാങ്ക് സെക്രട്ടറി റെജി, ജീവനക്കാരായ ബിനോയ്, സുജമോള് എന്നിവരുടെ മൊഴികളാണ് ആദ്യഘട്ടത്തില് രേഖപ്പെടുത്തുക. ഇടുക്കി മെഡിക്കല് കോളജ് ആശുപത്രിയിലെ പോസ്റ്റ്മോര്ട്ടത്തിന് ശേഷം മൃതദേഹം കട്ടപ്പനയിലെ സ്വകാര്യ ആശുപത്രി മോര്ച്ചറിയിലേക്ക് മാറ്റിയിട്ടുണ്ട്. വിദേശത്തുള്ള ബന്ധുക്കള് എത്തിയ ശേഷമായിരിക്കും സംസ്കാരം.
സിപിഎം നിയന്ത്രണത്തിലുള്ള കട്ടപ്പന റൂറല് ഡെവലപ്മെന്റ് കോ ഓപ്പറേറ്റീവ് സൊസൈറ്റിക്ക് മുന്നിലാണ് സാബുവിനെ മരിച്ച നിലയില് കണ്ടത്.സാബുവിന് 25 ലക്ഷത്തോളം രൂപ നിക്ഷേപമുണ്ടെന്നാണ് വിവരം. ഈ തുക തിരികെ ആവശ്യപ്പെട്ട് സാബു വ്യാഴാഴ്ച ബാങ്കില് എത്തിയിരുന്നു. ഭാര്യയുടെ ചകിത്സയ്ക്കായി പണം ആവശ്യപ്പെട്ടെത്തിയ സാബുവിനെ ജീവനക്കാര് അപമാനിച്ചിറക്കി വിട്ടെന്ന പരാമര്ശം ആത്മഹത്യാക്കുറിപ്പിലുമുണ്ട്. സംഭവത്തിൽ കടുത്ത പ്രതിഷേധവുമായി ബിജെപി- കോണ്ഗ്രസ് പ്രവര്ത്തകര് രംഗത്തെത്തിയിരുന്നു. എന്നാല് സാമ്പത്തിക പ്രതിസന്ധിയുണ്ടെന്നും നിക്ഷേപകര്ക്ക് ഘട്ടം ഘട്ടമായി പണം നല്കുന്നുണ്ടെന്നുമാണ് ബാങ്ക് അധികൃതരുടെ വിശദീകരണം.