സംസ്ഥാനത്തെ എല്ലാ റേഷന്‍ കടകളും ഞായറാഴ്ച തുറന്നു പ്രവര്‍ത്തിക്കും

തിരുവനന്തപുരം: സംസ്ഥാനത്തെ എല്ലാ റേഷന്‍ കടകളും തുറന്നു പ്രവര്‍ത്തിക്കും. ഞായറാഴ്ച തന്നെ ഓഗസ്റ്റിലെ റേഷന്‍ വിതരണവും സ്‌പെഷല്‍ അരിയുടെ വിതരണവും പൂര്‍ത്തിയാകും. ഈ മാസം ഇതുവരെ 82% ഗുണഭോക്താക്കള്‍ റേഷന്‍ വിഹിതം കൈപ്പറ്റിയിട്ടുണ്ട്. 

ഓഗസ്റ്റിലെ റേഷന്‍ ഇനിയും വാങ്ങാത്തവര്‍ 31ന് മുന്‍പു തന്നെ വാങ്ങേണ്ടതാണെന്നും സ്റ്റോക്കെടുപ്പ് പ്രമാണിച്ച് സെപ്റ്റംബര്‍ ഒന്നിന് (തിങ്കള്‍) റേഷന്‍കടകള്‍ക്ക് അവധിയായിരിക്കുമെന്നും അധികൃതര്‍ അറിയിച്ചു.

സെപ്റ്റംബര്‍ 2 മുതല്‍ ആ മാസത്തെ റേഷന്‍ വിതരണം ആരംഭിക്കും. ഒന്നാം ഓണ ദിവസമായ സെപ്റ്റംബര്‍ 4ന് റേഷന്‍കടകള്‍ തുറന്നു പ്രവര്‍ത്തിക്കുന്നതായിരിക്കും. എഎവൈ കാര്‍ഡുടമകള്‍ക്കും ക്ഷേമസ്ഥാപനങ്ങളിലെ അന്തേവാസിള്‍ക്കുമുള്ള ഓണക്കിറ്റ് വിതരണം സെപ്റ്റംബറിലും തുടരും.