മുന്‍ എംപി ചെങ്ങറ സുരേന്ദ്രനെ സസ്‌പെന്‍ഡ് ചെയ്ത് സിപിഐ

കൊല്ലം: മുന്‍ എം.പിയും മുതിര്‍ന്ന നേതാവുമായ ചെങ്ങറ സുരേന്ദ്രനെ സിപിഐയില്‍ നിന്ന് ഒരു വര്‍ഷത്തേക്ക് സസ്‌പെന്‍ഡ് ചെയ്തു. പാര്‍ട്ടി വിരുദ്ധ പ്രവര്‍ത്തനങ്ങളുടെ പേരിലാണ് നടപടി. പാര്‍ട്ടിയുടെ പ്രാഥമിക അംഗത്വത്തില്‍ നിന്നടക്കമാണ് സസ്‌പെന്‍ഡ് ചെയ്തത്. 

സിപിഐ കൊല്ലം ജില്ലാ കൗണ്‍സിലിന്റേതാണ് തീരുമാനം. ചെങ്ങറ സുരേന്ദ്രനെതിരെ സിപിഐ സംസ്ഥാന സെക്രട്ടറിക്ക് നേരത്തെ  പരാതി ലഭിച്ചിരുന്നു. ഇന്ന് ചേര്‍ന്ന സിപിഐ കൊല്ലം  ജില്ലാ കൗണ്‍സിലില്‍ ഈ പരാതി ചര്‍ച്ച ചെയ്തു. 

യോഗത്തില്‍ പങ്കെടുത്ത ചെങ്ങറ സുരേന്ദ്രനോട് വിശദീകരണം തേടിയെങ്കിലും വിശദീകരണം തൃപ്തികരമല്ലെന്ന യോഗത്തിന്റെ വിലയിരുത്തലിന്റെ അടിസ്ഥാനത്തിലാണ് നടപടിയെടുത്തത്.