/kalakaumudi/media/agency_attachments/zz0aZgq8g5bK7UEc9Bb2.png)
/kalakaumudi/media/media_files/m5UAcQRrf0zKdQn4lCLX.jpg)
തിരുവനന്തപുരം: മലപ്പുറത്തെ നിപ പ്രതിരോധം പൂർണം . ആരോഗ്യ വകുപ്പ് നിശ്ചയിച്ചിരുന്ന ഡബിള് ഇന്ക്യുബേഷന് പീരീഡ് ആയ 42 ദിവസം കഴിഞ്ഞതിനാല് നിയന്ത്രണങ്ങള് ഒഴിവാക്കി. സമ്പര്ക്കപ്പട്ടികയില് ഉള്പ്പെട്ട 472 പേരേയും പട്ടികയില് നിന്നും ഒഴിവാക്കി. പ്രത്യേക കണ്ട്രോള് റൂം പ്രവര്ത്തനം അവസാനിപ്പിച്ചു. മരണമടഞ്ഞ കുട്ടിക്ക് മാത്രമാണ് നിപ സ്ഥിരീകരിച്ചത്. എന്നാല് ശക്തമായ പ്രതിരോധ പ്രവര്ത്തനങ്ങള് നടത്തിയത് കാരണം മറ്റൊരാളിലേക്ക് രോഗം പകരാതെ പ്രതിരോധിക്കാനായി.
മലപ്പുറത്തെ സ്ഥിതിഗതികൾ ആരോഗ്യ വകുപ്പ് മന്ത്രിയുടെ നേതൃത്വത്തില് യോഗം ചേർന്ന് വിലയിരുത്തി. ഡബിള് ഇന്ക്യുബേഷന് പീരീഡ് കഴിഞ്ഞെങ്കിലും ജാഗ്രത തുടരണമെന്ന് മന്ത്രി വീണാ ജോര്ജ് പറഞ്ഞു. ഒറ്റക്കെട്ടായി പ്രവര്ത്തിച്ച മുഴുവന് ടീമിനേയും മന്ത്രി അഭിനന്ദിച്ചു. മറ്റൊരാളിലേക്ക് നിപ വൈറസ് പകരാതെ സംരക്ഷിക്കാനായത് ഒറ്റക്കെട്ടായുള്ള പ്രവര്ത്തനം കൊണ്ടാണ്. കുട്ടിയുടെ മരണം തീരാനഷ്ടമാണെന്നും മന്ത്രി ഓര്മ്മിച്ചു.
മഞ്ചേരി മെഡിക്കല് കോളേജിലും കോഴിക്കോട് മെഡിക്കല് കോളേജിലും ആവശ്യമായ തീവ്ര പരിചരണ സംവിധാനങ്ങളും ക്രമീകരിച്ചു. പാണ്ടിക്കാട്, ആനക്കയം പഞ്ചായത്തുകളില് താൽക്കാലിക നിയന്ത്രണങ്ങള് ഏര്പ്പെടുത്തി. വണ്ടൂര്, നിലമ്പൂര്, കരുവാരക്കുണ്ട് എന്നിവിടങ്ങളില് പ്രത്യേക പനി ക്ലിനിക്കുകള് തുടങ്ങി. മാനസികാരോഗ്യം ഉറപ്പാക്കി. നിരീക്ഷണത്തിലിരിക്കുന്നവരുടെ വീടുകളില് ഭക്ഷണം, മരുന്ന് ഉള്പ്പെടെയുള്ളവ എത്തിക്കുന്നതിന് സന്നദ്ധ പ്രവര്ത്തകരുടെ സേവനം ലഭ്യമാക്കി.