ജനങ്ങൾ ആഗ്രഹിക്കുന്ന ഭരണമാറ്റത്തിന് വഴി തുറക്കുന്ന രീതിയിൽ പ്രവർത്തന സജ്‌ജമാകുമെന്നും കേരളത്തിലെ തെരുവുകൾ കത്തുന്ന സമരമുറകളിലേക്ക് കടക്കുമെന്നും ഒ ജെ ജെനീഷ്

തൃശൂര്‍:കേരളത്തിലെ തെരുവുകള്‍ കത്തുന്ന സമരങ്ങളിലേക്ക് യൂത്ത് കോണ്‍ഗ്രസ് പോകുമെന്ന് പുതിയ സംസ്ഥാന അധ്യക്ഷന്‍ ഒ.ജെ. ജനീഷ് പറഞ്ഞു.

ജനങ്ങളാഗ്രഹിക്കുന്ന ഭരണ മാറ്റത്തിന് വഴി തുറക്കുമെന്നും യുവാക്കള്‍ക്ക് അവസരങ്ങള്‍ നല്‍കുന്ന നേതൃത്വമാണ് കോണ്‍ഗ്രസില്‍ ഇപ്പോഴുള്ളതെന്നും ജെനീഷ് പറഞ്ഞു .

അവസരങ്ങള്‍ നിഷേധിക്കപ്പെട്ടാല്‍ ചോദിക്കുക തന്നെ ചെയ്യും. രാഹുല്‍ മാങ്കൂട്ടത്തിലിനെതിരായ നടപടി പാര്‍ട്ടി തീരുമാനം ആണെന്നും  ജനീഷ്  പറഞ്ഞു.

 ജനകീയമായ സമരങ്ങളുമായി യൂത്ത് കോണ്‍ഗ്രസ് സര്‍ക്കാരിനെതിരായ പ്രതിഷേധം ശക്തമാക്കും.

വിവാദങ്ങളൊന്നും യൂത്ത് കോണ്‍ഗ്രസിനെ ബാധിക്കില്ല.

ആ രീതിയിൽ സംഘടനയെ മുന്നോട്ടുകൊണ്ടുപോകും. യുവാക്കള്‍ക്ക് പാര്‍ട്ടി അര്‍ഹമായ പ്രധാന്യം നൽകിയിട്ടുണ്ടെന്നും ഒജെ ജനീഷ് പറഞ്ഞു.

ഇന്നലെയാണ് ഒ.ജെ. ജനീഷിനെ യൂത്ത് കോൺഗ്രസ് അധ്യക്ഷനായി പ്രഖ്യാപിച്ചത്. കെ.സി വേണുഗോപാല്‍ പക്ഷക്കാരനായ ബിനു ചുള്ളിയിലിനെ പുതിയ വര്‍ക്കിങ് പ്രസിഡന്‍റായും നിയമിച്ചിട്ടുണ്ട്.

 സംസ്ഥാന അധ്യക്ഷനാകുമെന്ന് കരുതിയ അബിന്‍ വര്‍ക്കിയെയും കെ.എം അഭിജിത്തിനെയും ദേശീയ സെക്രട്ടറിമാരായും പ്രഖ്യാപിച്ചു.

 ഗ്രൂപ്പ് താല്‍പ്പര്യങ്ങളും സാമുദായിക പരിഗണനകളും കണക്കിലെടുത്താണ് പുതിയ ഭാരവാഹികളെ പ്രഖ്യാപിച്ചത്.

അബിന്‍ വര്‍ക്കിക്കുവേണ്ടി ഐ ഗ്രൂപ്പും ബിനു ചുള്ളിയിലിനായി കെ.സി ഗ്രൂപ്പും കെഎം അഭിജിത്തിന് വേണ്ടി എ ഗ്രൂപ്പും ബലപരീക്ഷണം തുടങ്ങിയതോടെയാണ് ഒജെ ജനീഷിന്‍റെ പേര് സമവായ നീക്കത്തില്‍ ഒന്നാമതെത്തിയത്.

സംഘടനാ തെരഞ്ഞെടുപ്പില്‍ ഏറ്റവും കൂടുതല്‍ വോട്ടുനേടിയ വൈസ് പ്രസി‍ഡന്‍റ് അബിന്‍ വര്‍ക്കിയായതിനാല്‍ പ്രസിഡന്‍റ് സ്ഥാനത്തേക്ക് സ്വാഭാവിക നീതി വേണമെന്ന വാദമാണ് രമേശ് ചെന്നിത്തല മുന്നോട്ടുവച്ചത്.

എ ഗ്രൂപ്പിന്‍റെ കയ്യിലുള്ള പ്രസിഡ‍ന്‍റ് പദവിക്ക് തുടര്‍ച്ചവേണമെന്ന വാദവുമായി എ ഗ്രൂപ്പും എംകെ രാഘവനുമടക്കമുള്ള നേതാക്കളും അഭിജിത്തിനെ പിന്തുണച്ചു.

 കെ.സി വേണുഗോപാല്‍ പക്ഷം ഹരിപ്പാട് നിന്നുള്ള ബിനു ചുള്ളിയിലിനെ കൊണ്ടുവരാനും നീക്കം തുടങ്ങി. തര്‍ക്കം മുറുകിയതോടെ ഷാഫി പറമ്പില്‍ ഒ.ജെ ജനീഷിന്‍റെ പേര് തന്ത്രപരമായി മുന്നോട്ടുകൊണ്ടുവന്നു.