തലസ്ഥാനത്ത് 'ഓപ്പറേഷൻ ആ​ഗ്': ​​കരമന, നേമം പ്രദേശത്തെ ഗുണ്ടകളുടെ വീടുകളിൽ പൊലീസ് റെയ്ഡ്

തിരുവനന്തപുരം: തലസ്ഥാനത്തെ ​ഗുണ്ടകളുടെ വീടുകളിൽ റെയ്ഡ് നടത്തി പൊലീസ്.ഓപ്പറേഷൻ ആ​ഗ് എന്ന പേരിലാണ് റെയ്ഡ് നടത്തുന്നത്. കരമന നേമം മേഖലയിലാണ് പൊലീസ് പരിശോധന നടക്കുന്നത്. തലസ്ഥാനത്ത് വിവിധ ഇടങ്ങളിൽ ​ഗുണ്ടാ ആക്രമണങ്ങൾ തുടർക്കഥയാവുകയാണ്.കഴിഞ്ഞ ദിവസം കരമനയിൽ അഖിൽ എന്ന യുവാവിനെ സംഘം ചേർന്ന് കൊലപ്പെടുത്തിയിരുന്നു.

പ്രതികളെ 3 ദിവസങ്ങൾക്ക് ശേഷമാണ് പൊലീസ് പിടികൂടുന്നത്.പലയിടത്തും വീടുകൾക്ക് നേരെയും ജനങ്ങൾക്ക് നേരെയും ​ഗുണ്ടാക്രമണങ്ങൾ നടന്നതായി വാർത്തകൾ വന്നിരുന്നു. സംഭവം മാധ്യമങ്ങളിലടക്കം ചർച്ചാവിഷയമായതോടെയാണ് പൊലീസ് ഇടപെടുകയും അടിയന്തര നടപടികളിലേക്ക് കടക്കുകയും ചെയ്തിരിക്കുന്നത്. 

ചൊവ്വാഴ്ച രാത്രി വെള്ളറടയിൽ വീണ്ടും ലഹരിമാഫിയയുടെ ആക്രമണം ഉണ്ടായിരുന്നു.പൊലീസിനെതിരെ വ്യാപക വിമർശനവുമുയർന്നിട്ടുണ്ട്. സിറ്റി പൊലീസ കമ്മീഷണറുടെയും റൂറൽ എസ്പിയുടെയും നിർദ്ദേശപ്രകാരമാണ് ഇപ്പോൾ ​ഗുണ്ടാലിസ്റ്റിൽ പെട്ട കുറ്റവാളികളുടെ വീടുകളിൽ റെയ്ഡ് നടത്താനുള്ള തീരുമാനം. ഇന്ന് പുലർച്ചെ മുതലാണ് ഇവരുടെ വീടുകളിൽ റെയ്ഡ് നടത്തുന്നത്. ഇവരിൽ കാപ്പ ചുമത്തപ്പെട്ട പ്രതികളുടെ വീടുകളുമുണ്ട്. സംസ്ഥാനതലത്തിലേക്ക് ഈ പരിശോധന വ്യാപിപ്പിക്കാനും സാധ്യതയുണ്ട്.