പത്തനംതിട്ട പീഡനം; രണ്ടുപ്രതികള്‍ കൂടി പിടിയില്‍

ആകെ പിടിയിലായവരുടെ എണ്ണം 44 ആയി. 5 ദിവസത്തിനിടെയാണു 44 പ്രതികളെ പൊലീസ് പിടികൂടിയത്. 5 സ്റ്റേഷനുകളിലായി 29 കേസുകളാണ് ഇതുവരെ റജിസ്റ്റര്‍ ചെയ്തിട്ടുള്ളത്

author-image
Punnya
New Update
pathanamthitta rape

പത്തനംതിട്ട: ദലിത് പെണ്‍കുട്ടിയെ പീഡിപ്പിച്ച കേസില്‍ രണ്ടുപ്രതികള്‍ കൂടി പിടിയില്‍. പത്തനംതിട്ട സ്വദേശിയായ ഷിനു ജോര്‍ജ് (23), ഇലവുംതിട്ടയില്‍ പ്രജിത് കുമാര്‍ (24) എന്നിവരെയാണ് അറസ്റ്റു ചെയ്തത്. ഇതോടെ ആകെ പിടിയിലായവരുടെ എണ്ണം 44 ആയി. 5 ദിവസത്തിനിടെയാണു 44 പ്രതികളെ പൊലീസ് പിടികൂടിയത്. 5 സ്റ്റേഷനുകളിലായി 29 കേസുകളാണ് ഇതുവരെ റജിസ്റ്റര്‍ ചെയ്തിട്ടുള്ളത്. ഇനി പിടിയിലാകാനുള്ള 14 പ്രതികളില്‍ 2 പേര്‍ വിദേശത്താണ്. ഇവരെ നാട്ടിലെത്തിക്കാനുള്ള നടപടികള്‍ പൊലീസ് സ്വീകരിക്കും. ഒരാള്‍ സംസ്ഥാനത്തിനു പുറത്താണെന്നാണു സൂചന. ഇലവുംതിട്ട പൊലീസ് സ്റ്റേഷനില്‍ രജിസ്റ്റര്‍ ചെയ്ത ആദ്യ കേസില്‍ റാന്നി മജിസ്‌ട്രേറ്റ് കഴിഞ്ഞ ദിവസം കുട്ടിയുടെ രഹസ്യമൊഴി രേഖപ്പെടുത്തിയിരുന്നു. പത്തനംതിട്ടയില്‍ രജിസ്റ്റര്‍ ചെയ്ത ഒരു കേസ് തിരുവനന്തപുരം കല്ലമ്പലം സ്റ്റേഷനിലേക്കു കൈമാറിയിരുന്നു. എന്നാല്‍ പ്രതിയുടെ പേരോ വിലാസമോ ലഭിച്ചില്ലെന്നും അന്വേഷണം നടക്കുന്നുണ്ടെന്നും കല്ലമ്പലം ഇന്‍സ്‌പെക്ടര്‍ ആര്‍.ശിവകുമാര്‍ അറിയിച്ചു. ഇനി അറസ്റ്റിലാവാനുള്ളത് ഇലവുംതിട്ട സ്റ്റേഷനില്‍ രജിസ്റ്റര്‍ ചെയ്ത കേസുകളില്‍ 9 പ്രതികളും പത്തനംതിട്ട സ്റ്റേഷനിലെ കേസുകളിലെ 4 പേരും മലയാലപ്പുഴ സ്റ്റേഷനില്‍ രജിസ്റ്റര്‍ ചെയ്ത കേസിലെ ഒരു പ്രതിയുമാണ്. ഇലവുംതിട്ട സ്റ്റേഷനിലെ പ്രതികളില്‍ ഒരാള്‍ പത്തനംതിട്ട പൊലീസ് കഴിഞ്ഞ വര്‍ഷമെടുത്ത പോക്‌സോ കേസില്‍ നിലവില്‍ ജയിലിലാണ്. വിദ്യാര്‍ഥിനിയുടെ സഹപാഠികളും ഉയര്‍ന്ന ക്ലാസുകളില്‍ പഠിക്കുന്നവരും കേസില്‍ പ്രതികളായിട്ടുണ്ട്.

Arrest rape pathanamthita