മത്സരിച്ച് മദ്യപാനം; പ്ലസ് ടു വിദ്യാര്‍ത്ഥിയെ ഐസിയുവില്‍ പ്രവേശിപ്പിച്ചു

തിരുവനന്തപുരം: തിരുവനന്തപുരത്ത് ഓണാഘോഷത്തിനിടെ സുഹൃത്തുക്കള്‍ക്കൊപ്പം മത്സരിച്ച് മദ്യം കഴിച്ച വിദ്യാര്‍ത്ഥി ഗുരുതരാവസ്ഥയില്‍ തീവ്രപരിചണ വിഭാഗത്തില്‍ പ്രവേശിപ്പിച്ചു. ഇന്നലെ ആല്‍ത്തറയിലെ പണി പുരോഗമിക്കുന്ന വീട്ടിലാണ് നഗരത്തിലെ വിവിധ സ്‌കൂളുകളിലെ ഏഴ് വിദ്യാര്‍ത്ഥികള്‍ ഒത്തുചേര്‍ന്ന് മദ്യപിച്ചത്. 

അമിതമായി മദ്യപിച്ച പ്ലസ്ടു വിദ്യാര്‍ത്ഥി കുഴഞ്ഞു വീണതോടെ 5 പേര്‍ ഓടി രക്ഷപ്പെട്ടു. ഒപ്പമുണ്ടായിരുന്ന ഒരു വിദ്യാര്‍ത്ഥിയാണ് മ്യൂസിയം പൊലിസിനെ വിവരം അറിയിച്ചത്. പൊലീസാണ് സ്ഥലത്തെത്തി വിദ്യാര്‍ത്ഥിയെ ആംബുലന്‍സില്‍ മെഡിക്കല്‍ കോളേജ് ആശുപത്രിയിലെത്തിച്ചത്. 

തീര്‍ത്തും അവശനായ വിദ്യാര്‍ത്ഥിയെ തീവ്രപരിചണ വിഭാഗത്തിലേക്ക് മാറ്റുകയായിരുന്നു. സംഭവത്തില്‍ മ്യൂസിയം പൊലീസ് ഇതേ വരെ കേസൊന്നും രജിസ്റ്റര്‍ ചെയ്തിട്ടില്ല. വിവിധ സ്‌കൂകളിലെ കുട്ടികള്‍ ചേര്‍ന്നാണ് മദ്യപിച്ചത്. ഓണാഘോഷത്തിന് മുണ്ടുടുത്തെത്തിയ വിദ്യാര്‍ത്ഥികള്‍ ബെവ്‌ക്കോ ഔട്ട് ലെറ്റില്‍ പോയാണ് മദ്യം വാങ്ങിയത്.