വയനാട്ടില്‍ പറന്നിറങ്ങി സോണിയയും രാഹുലും

കല്‍പറ്റ: ലോക്‌സഭ പ്രതിപക്ഷ നേതാവ് രാഹുല്‍ ഗാന്ധി, കോണ്‍ഗ്രസ് പാര്‍ലമെന്ററി പാര്‍ട്ടി അധ്യക്ഷ സോണിയ ഗാന്ധി എന്നിവര്‍ വയനാട്ടിലെത്തി. രാവിലെ 10ന് കരിപ്പൂര്‍ വിമാനത്താവളത്തിലിറങ്ങിയ ഇരുവരും ഹെലികോപ്റ്റര്‍ മാര്‍ഗമാണ് വയനാട്ടിലെത്തിയത്. 

മണ്ഡല പര്യടനത്തിന് ഒരാഴ്ചയായി വയനാട്ടിലുള്ള പ്രിയങ്ക ഗാന്ധി, പടിഞ്ഞാറത്തറയില്‍ ഹെലികോപ്റ്ററില്‍ ഇറങ്ങിയ ഇരുവരെയും സ്വീകരിക്കാന്‍ എത്തിയിരുന്നു. ഇരുവര്‍ക്കും ഇന്ന് പൊതുപരിപാടികളൊന്നും നിശ്ചയിച്ചിട്ടില്ല.

കെപിസിസി പ്രസിഡന്റ് സണ്ണി ജോസഫ്, ഡിസിസി പ്രസിഡന്റ് എന്‍.ഡി.അപ്പച്ചന്‍, ടി.സിദ്ദീഖ് എംഎല്‍എ തുടങ്ങിയ നേതാക്കള്‍ സോണിയയെയും രാഹുലിനെയും ഷാള്‍ അണിയിച്ച് സ്വീകരിച്ചു. കെ.സി.വേണുഗോപാല്‍ എംപിയും സോണിയയ്ക്കും രാഹുലിനും ഒപ്പമുണ്ട്. 

സ്വകാര്യ സന്ദര്‍ശനത്തിനാണ് രാഹുലും സോണിയയും എത്തിയതെങ്കിലും നിയമസഭാ തിരഞ്ഞെടുപ്പിന്റെ മുന്നൊരുക്കം സംബന്ധിച്ച് വയനാട്ടില്‍ കെപിസിസി നേതൃത്വവുമായി കൂടിക്കാഴ്ച ഉണ്ടാകും. ഗ്രൂപ്പ് തര്‍ക്കങ്ങള്‍ നിലവിലുള്ള വയനാട്ടില്‍ ആ വിഷയങ്ങളും ഈ കൂടിക്കാഴ്ചയില്‍ ചര്‍ച്ചയായേക്കും. പ്രിയങ്ക ഗാന്ധിയുടെ പ്രചാരണത്തിനാണ് നേരത്തെ സോണിയ ഗാന്ധി വയനാട്ടില്‍ എത്തിയത്.