/kalakaumudi/media/agency_attachments/zz0aZgq8g5bK7UEc9Bb2.png)
/kalakaumudi/media/member_avatars/2025/01/24/2025-01-24t111056647z-bijuks.png )
/kalakaumudi/media/media_files/2026/01/16/r6-2026-01-16-08-43-41.jpg)
പത്തനംതിട്ട: ബലാത്സംഗ കേസില് റിമാന്ഡിലുള്ള പാലക്കാട് എംഎല്എ രാഹുല് മാങ്കൂട്ടത്തിലിന്റെ ജാമ്യ ഹര്ജി തിരുവല്ല മജിസ്ട്രേറ്റ് കോടതി ഇന്ന് പരിഗണിക്കും. വിശദമായ വാദം ജാമ്യഹര്ജിയില് ഉണ്ടാകും. കേസ് അന്വേഷിക്കുന്ന എസ്ഐടിയുടെ റിപ്പോര്ട്ട് കൂടി പരിഗണിച്ചായിരിക്കും ജാമ്യാപേക്ഷയില് കോടതി തീരുമാനം പറയുക.
കഴിഞ്ഞ ദിവസം കസ്റ്റഡിയില് വാങ്ങിയ രാഹുലിനെ പീഡനം നടന്നതായി പറയപ്പെടുന്ന തിരുവല്ലയിലെ ഹോട്ടലില് എത്തിച്ച് തെളിവെടുത്തിരുന്നു. ചോദ്യം ചെയ്യല് അടക്കം രാഹുല് സഹകരിക്കുന്നില്ലെന്ന കാര്യം സ്റ്റേറ്റ് ക്രൈം ബ്രാഞ്ച്, കോടതിയെ ബോധ്യപ്പെടുത്തും. അതേസമയം നടപടിക്രമങ്ങള് പാലിക്കാതെയുള്ള അറസ്റ്റ് എന്ന ആരോപണം തെളിയിക്കാനാകും പ്രതിഭാഗത്തിന്റെ ശ്രമം.
ഇതിനിടെ രാഹുല് മാങ്കൂട്ടത്തിലിനെതിരെ പരാതി നല്കിയ യുവതിക്കെതിരെ സൈബര് അധിക്ഷേപം നടത്തിയതിന് കേസ്. രാഹുല് മാങ്കൂട്ടത്തിന്റെ സുഹൃത്തും കോണ്ഗ്രസ് പ്രവര്ത്തകനുമായ ഫെനി നൈനാനെതിരെയാണ് കേസെടുത്തു. യുവതി നല്കിയ പരാതിയിലാണ് പത്തനംതിട്ട സൈബര് പൊലീസിന്റെ നടപടി. യുവതിയുടെ ചാറ്റുകള് ഉള്പ്പെടെ വെളിപ്പെടുത്തിയാണ് ഫെനി നൈനാല് അധിക്ഷേപ പോസ്റ്റിട്ടത്.
കസ്റ്റഡിക്ക് ശേഷം രാഹുലിനെ തിരികെ ജയിലില് എത്തിക്കുമ്പോള് ഇന്നലെയും ബിജെപി യുവമോര്ച്ച പ്രവര്ത്തകര് പ്രതിഷേധിച്ചു. കോടതിയില് ഹാജരാക്കും മുമ്പ് ഇന്നലെ ഉച്ചയ്ക്ക് രാഹുലിനെ പത്തനംതിട്ട ജനറല് ആശുപത്രിയില് എത്തിച്ച് പൊലീസ് സംഘം വൈദ്യ പരിശോധന നടത്തി.
കഴിഞ്ഞ ദിവസത്തെ വന് പ്രതിഷേധം കണക്കിലെടുത്തു വന് പോലിസ് സന്നാഹം ഏര്പ്പെടുത്തിയിരുന്നു. എങ്കിലും ആശുപത്രിയില് പ്രതിഷേധക്കാരാരും ഉണ്ടായിരുന്നില്ല. വൈദ്യ പരിശോധനയ്ക്ക് കയറും മുന്പ് മാധ്യമങ്ങള് പ്രതികരണം തേടിയെങ്കിലും രാഹുല് പതിവ് മൗനം തുടര്ന്നു.