ദുബൈയില്‍ വച്ച് പീഡിപ്പിച്ചെന്ന്; നിവിന്‍ പോളിക്കെതിരെ കേസ്

നടന്‍ നിവിന്‍ പോളി പീഡിപ്പിച്ചതായി യുവതിയുടെ പരാതി. സിനിമയില്‍ വാഗ്ദാനം ചെയ്ത് പീഡിപ്പിച്ചെന്ന പരാതിയില്‍ എറണാകുളം ഊന്നുകല്‍ പോലീസ് കേസെടുത്തു. ജാമ്യമില്ലാ വകുപ്പ് ചുമത്തിയാണ് കേസ്. എറണാകുളം നേര്യമംഗലം സ്വദേശിനിയാണ് പരാതി നല്‍കിയത്. 

കേസില്‍ നിവിന്‍ പോളി ആറാം പ്രതിയും നിര്‍മാതാവ് എ കെ സുനില്‍ രണ്ടാം പ്രതിയുമാണ്. കഴിഞ്ഞ നവംബറില്‍ ദുബൈയില്‍ വച്ച് പീഡിപ്പിച്ചെന്നാണ് പരാതി.

ശ്രേയ, ബഷീര്‍, കുട്ടന്‍ എന്നിവരെയും കേസില്‍ പ്രതി ചേര്‍ത്തിട്ടുണ്ട്.

ഹേമ കമ്മിറ്റി റിപ്പോര്‍ട്ട് പുറത്തുവന്നതിന് പിന്നാലെ രൂപവത്കരിച്ച പ്രത്യേക അന്വേഷണസംഘത്തെ(എസ്‌ഐടി) യുവതി സമീപിക്കുകയും എസ്‌ഐടി ഈ വിവരം ഊന്നുകല്‍ പോലീസിനെ അറിയിക്കുകയും ചെയ്തു. ഇതിന്റെ അടിസ്ഥാനത്തിലാണ് പോലീസ് കേസ് രജിസ്റ്റര്‍ ചെയ്തത്.