ശബരിമല ദ്വാരപാലക ശില്‍പ്പങ്ങളുടെ സ്വര്‍ണപ്പാളികള്‍ സന്നിധാനത്ത് തിരിച്ചെത്തിച്ചു

പത്തനംതിട്ട: ശബരിമലയിലെ ദ്വാരപാലക ശില്പങ്ങളുടെ സ്വര്‍ണ്ണപ്പാളികള്‍ സന്നിധാനത്ത് തിരിച്ചെത്തിച്ചു. കോടതി അനുമതി വാങ്ങി ശില്പങ്ങളില്‍ സ്വര്‍ണപ്പാളി തിരികെ സ്ഥാപിക്കും. 

അറ്റകുറ്റപ്പണിക്ക് വേണ്ടിയായിരുന്നു ചെന്നൈയിലേ കമ്പനിയിലേക്ക് സ്വര്‍ണപ്പാളികള്‍ കൊണ്ടുപോയത്. കോടതി അനുമതിയില്ലാതെ സ്വര്‍ണപ്പാളികള്‍ ഇളക്കിമാറ്റി അറ്റകുറ്റപ്പണിക്കായി കൊണ്ടുപോയത് വലിയ വിവാദമായിരുന്നു. 

തുടര്‍ന്നുള്ള പരിശോധനയില്‍ 2019 ല്‍ സ്വര്‍ണ്ണപ്പാളി സ്ഥാപിച്ചതില്‍ അടക്കം സംശയങ്ങള്‍ ഉന്നയിച്ച ഹൈക്കോടതി വിജിലന്‍സ് അന്വേഷണം പ്രഖ്യാപിച്ചിരിക്കുകയാണ്. ഇതിനിടെയാണ് അറ്റകുറ്റപ്പണി നടത്തിയശേഷം സ്വര്‍ണപ്പാളികള്‍ തിരികെ ശബരിമല സന്നിധാനത്ത് എത്തിച്ചത്. 

സ്വര്‍ണപ്പാളികള്‍ ശില്‍പ്പത്തില്‍ തിരികെ സ്ഥാപിക്കുന്നതിനായി കോടതി അനുമതി കിട്ടും വരെ സ്‌ട്രോങ് റൂമില്‍ സൂക്ഷിക്കുമെന്ന് ദേവസ്വം അധികൃതര്‍ അറിയിച്ചു.