എസ്.എന്‍.ഡി.പി യോഗം അസി.സെക്രട്ടറി പി.എസ്. വിജയന്റെ സംസ്‌കാരം നടത്തി

തിരുവല്ല : കഴിഞ്ഞ ദിവസം അന്തരിച്ച എസ്.എന്‍.ഡി.പിയോഗം അസി.സെക്രട്ടറി കുന്നന്താനം നവീനത്തില്‍ പി.എസ്.വിജയന്‍ (72)ന്റെ സംസ്‌കാരം നടത്തി. ഹൃദയാഘാതത്തെ തുടര്‍ന്ന് കഴിഞ്ഞ ദിവസം ഉച്ചയോടെ അദ്ദേഹത്തെ തിരുവല്ലയിലെ സ്വകാര്യ മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചെങ്കിലും 1.30ന് മരണം സംഭവിച്ചു. മൃതദേഹം ഇന്നലെ ഉച്ചയ്ക്കുശേഷം മൂന്നിന് എസ്.എന്‍.ഡി.പി യോഗം തിരുവല്ല യൂണിയന്‍ ഓഫീസിലും തുടര്‍ന്ന് വിലാപയാത്രയായി കുന്നന്താനം ശാഖയിലും എത്തിച്ച് പൊതുദര്‍ശനത്തിന് ശേഷം വീട്ടിലെത്തിച്ചു. ഇന്ന് രാവിലെ 11ന് വീട്ടുവളപ്പില്‍ സംസ്‌കരിച്ചു. 

എയര്‍ഫോഴ്‌സ് മുന്‍ ഉദ്യോഗസ്ഥനാണ്. എസ്.എന്‍.ഡി.പിയോഗം 50 -ാം കുന്നന്താനം ശാഖയുടെ യൂണിയന്‍ കമ്മിറ്റി അംഗം. തിരുവല്ല യൂണിയന്‍ കൗണ്‍സിലര്‍, ഡയറക്ടര്‍ ബോര്‍ഡ് മെമ്പര്‍, യൂണിയന്‍ സെക്രട്ടറി, യോഗം ഡയറക്ടര്‍ ബോര്‍ഡ് മെമ്പര്‍, യോഗം കൗണ്‍സിലര്‍, മാവേലിക്കര, കോഴഞ്ചേരി, വാമനപുരം, വര്‍ക്കല - ശിവഗിരി, അടൂര്‍, റാന്നി എന്നീ യൂണിയനുകളില്‍ അഡ്മിനിസ്‌ട്രേറ്റര്‍, യോഗം മൈക്രോഫിനാന്‍സ് സംസ്ഥാന കോര്‍ഡിനേറ്റര്‍ എന്നീ നിലകളില്‍ സേവനമനുഷ്ടിച്ചിട്ടുണ്ട്. ജെ.എസ്.എസ് സംസ്ഥാന കമ്മിറ്റിയംഗം, ശ്രീനാരായണ ട്രേഡ് യൂണിയന്‍ സ്ഥാപകനേതാവ്, ജനതാദള്‍ (എസ്) നേതാവ് എന്നീ നിലകളിലും പ്രവര്‍ത്തിച്ചിരുന്നു. ഭാര്യ : പൊയ്കയില്‍ കുടുംബാംഗം പുഷ്പമ്മ പി.കെ.
മകന്‍ : നവീന്‍ വിജയ് . മരുമകള്‍: പ്രീതി രവീന്ദ്രന്‍. ചെറുമക്കള്‍ : വൈഗ, ഗംഗ.

എസ്എന്‍ഡിപി യോഗം വൈസ്പ്രസിഡന്റ് തുഷാര്‍ വെള്ളപ്പള്ളി പി.എസ് വിജയന്റെ വീട്ടിലെത്തി അദ്ദേഹത്തിന് അന്ത്യാജ്ഞലിയര്‍പ്പിച്ചു.