/kalakaumudi/media/agency_attachments/zz0aZgq8g5bK7UEc9Bb2.png)
/kalakaumudi/media/media_files/WgP9Na96HoC90LDc11dC.JPG)
പത്തനംതിട്ട: ഹരിയാനയില്‍ ഐ ടി കമ്പനിയില്‍ ജോലിക്കുപോയ യുവാവിനെ കാണാതായിട്ട് മൂന്നു മാസം. ഹരിയാനയില്‍ നിന്ന് പഞ്ചാബില്‍ എത്തിയ ശേഷം യുവാവിനെക്കുറിച്ച് ഒരു സൂചനയും ഇല്ല. പത്തനംതിട്ട സ്വദേശി ശ്രീവിഷ്ണുവിനെ കാണാതായതു സംബന്ധിച്ച് ബന്ധുക്കള്‍ ഹരിയാന പോലീസിനു പരാതി നല്‍കി കാത്തിരിക്കുകയാണെങ്കിലും അന്വേഷണം എങ്ങുമെത്തിയില്ല.
മൂന്ന് വര്‍ഷം മുന്‍പ് ഓണ്‍ലൈനിലൂടെ സ്വന്തമായി കണ്ടെത്തിയ ഐ ടി കമ്പനിയിലെ ജോലിക്ക് വേണ്ടിയാണ് ശ്രീവിഷ്ണു ഹരിയാന ഗുരുഗ്രാമിലെ സുഖ്‌റാലിയില്‍ എത്തുന്നത്. ജോലിയില്‍ സ്ഥാനക്കയറ്റം ലഭിച്ചെന്നും ഫെബ്രുവരിയില്‍ നാട്ടിലേക്ക് വരാന്‍ അവധി ലഭിച്ചെന്നും വിഷ്ണു വീട്ടുകാരോട് പറഞ്ഞതിനു ശേഷമാണ് ഇയാളെക്കുറിച്ച് ഒരു വിവരവും ഇല്ലാതായത്. ജോലി ലഭിച്ച അന്ന് മുതല്‍ സെക്ടര്‍ 17 സിയിലെ മുറിയിലാണ് താമസിച്ചിരുന്നത്. പ്രമുഖ ഐടി സ്ഥാപനമായ ആക്‌സഞ്ചറിലെ സൂപ്പര്‍വൈസറായിരുന്ന വിഷ്ണു ആഴ്ചയില്‍ രണ്ട് ദിവസം ഓഫീസിലും ബാക്കി സമയം മുറിയിലിരുന്നുമായിരുന്നു ജോലി ചെയ്തിരുന്നത്.കാണാതായ ഡിസംബര്‍ പതിനൊന്നിന് വീട്ടുകാരുമായി വീഡിയോ കോളിലൂടെ വളരെ സന്തോഷത്തോടെ സംസാരിച്ചിരുന്നു. നഗരത്തിന് പുറത്തേക്കാണ് പോകുന്നതെന്ന് കെട്ടിട ഉടമയോട് പറഞ്ഞിരുന്നു. പതിനായിരം രൂപ വാട്‌സാപ്പിലൂടെ കടമായി ചോദിച്ചിരുന്നുവെന്നും എന്തിനാണ് പണമെന്ന് ചോദിക്കാന്‍ വിളിച്ചപ്പോള്‍ ഫോണ്‍ സ്വിച്ച് ഓഫായിരുന്നെന്നും ഉടമ പറയുന്നു. ഡിസംബര്‍ 11ന് താമസിക്കുന്ന മുറിയില്‍ നിന്ന് നഗരത്തിന് പുറത്തേക്ക് പോയതിനുശേഷം ഇതുവരെ വിഷ്ണുവിന്റെ ഫോണ്‍ ഓണായിട്ടില്ല. കാണാതായ ദിവസം ധരിച്ച വസ്ത്രവും മൊബൈല്‍ ഫോണുമല്ലാതെ വിഷ്ണുവിന്റെ സാധനങ്ങളെല്ലാം മുറിയിലുണ്ട്.ഒടുവില്‍ പഞ്ചാബിലെ അമൃത്സറില്‍ വിഷ്ണു എത്തിയതായാണ് പോലീസിന് വിവരം ലഭിച്ചത്. കാണാതായ ദിവസം ഗുരുഗ്രാമില്‍നിന്ന് ഡല്‍ഹിയിലെ കശ്മീരി ഗേറ്റിലേക്ക് വിഷ്ണു പോയതായും വിവരമുണ്ട്. ഡല്‍ഹിയില്‍ വിവിധ സംസ്ഥാനങ്ങളിലേക്കുള്ള ബസുകള്‍ പുറപ്പെടുന്ന സ്ഥലമാണ് കശ്മീരി ഗേറ്റ്. പിന്നെ ഒരു വിവരവുമില്ലെന്ന് ഗുരുഗ്രാം പോലീസ് പറയുന്നു. വിഷ്ണു അമൃത്സറിലെത്തിയെന്ന വിവരം പോലീസിന് കിട്ടിയെങ്കിലും അന്വേഷണം വഴിമുട്ടി. പോലീസ് അന്വേഷണം കാര്യക്ഷമമല്ലെന്നാണ് കുടുംബത്തിന്റെ പരാതി