അപകടങ്ങൾ തുടർക്കഥയാകുന്ന മുതലപ്പൊഴി സന്ദർശിച്ച് കേന്ദ്രമന്ത്രി സുരേഷ് ​ഗോപി

തിരുവനന്തപുരം: അപകടങ്ങൾ തുടർക്കഥയാകുന്ന മുതലപ്പൊഴി സന്ദർശിച്ച് കേന്ദ്രമന്ത്രി സുരേഷ് ​ഗോപി. തീര​ദേശ മേഖലയിലെ പ്രശ്നങ്ങൾ അദ്ദേഹം പൊലീസ് ഉദ്യോ​ഗസ്ഥരോട് ചോദിച്ച് മനസിലാക്കി. അഞ്ചുതെങ്ങ്, പൂന്തുറ ഭാ​ഗത്തും അദ്ദേഹം സന്ദർശനം നടത്തി.എന്നാൽ മഴയും പ്രതികൂല കാലാവസ്ഥയും കാരണം അദ്ദേഹം ഉടൻ മടങ്ങി.

ഇന്ന് രാവിലെയും ‌മുതലപ്പൊഴിയിൽ‌ വള്ളം മറിഞ്ഞ് മത്സ്യത്തൊഴിലാളിക്ക് ജീവൻ നഷ്ടമായിരുന്നു. അഴിമുഖത്ത് വള്ളം തലകീഴായി മറിഞ്ഞ് അഞ്ചുതെങ്ങ് സ്വദേശി വിക്ടറാണ് മരിച്ചത്. പുലർച്ചെ 1.30-ഓടെയായിരുന്നു അപകടം. ഇതിന് പിന്നാലെ രാവിലെ അഞ്ച് മണിയോടെ വീണ്ടും വള്ളം മറിഞ്ഞിരുന്നു. മത്സ്യബന്ധനത്തിനായി കടലിലേക്ക് പോകവേ വള്ളം മറിയുകയായിരുന്നു. പിന്നാലെ തൊഴിലാളി നീന്തി രക്ഷപ്പെട്ടു.
‌
ശിവ​ഗിരി സന്ദർശനത്തിനെത്തിയ വേളയിലായിരുന്നു അദ്ദേ​ഹത്തിന്റെ സന്ദർശനം. മഹാസമാധിയിൽ പുഷ്പാർച്ചന നടത്തി സന്യാസിമാരിൽ നിന്നും പ്രസാദം സ്വീകരിച്ചു. മുൻ കേന്ദ്രമന്ത്രി വി. മുരളീധരനും ഒപ്പമുണ്ടായിരുന്നു. സമാധിപീഠത്തിലെ ദർശന വേളയിൽ ​ഗുരുദേവ കൃതി ശിവപ്രസാദ പഞ്ചകം സുരേഷ് ​ഗോപി ഉരുവിട്ടു.