പുനലൂർ – കൊല്ലം മെമുവിൽ വിഷപ്പാമ്പ്; ഫയർഫോഴ്സ് എത്തി പാമ്പിനെ പിടികൂടി

കൊല്ലം: പുനലൂർ – കൊല്ലം മെമുവിൽ വിഷപ്പാമ്പിനെ കണ്ടെത്തി. ഓടിക്കൊണ്ടിരുന്ന ട്രെയിനിനുള്ളിലാണ് ഇന്നലെ രാത്രിയിൽ പാമ്പിനെ കണ്ടത്. സീറ്റിൻ്റെ അടിയിലേക്ക് കയറാൻ ഒരുങ്ങുന്ന തരത്തിലായിരുന്നു പാമ്പ് ഉണ്ടായിരുന്നത്. പാമ്പിനെ കണ്ടതോടെ യാത്രക്കാർ മാറിനിൽക്കുകയായിരുന്നു. തുടർന്ന് ട്രെയിൻ കൊല്ലത്ത് എത്തിയപ്പോൾ ഫയർഫോഴ്സ് എത്തി പാമ്പിനെ പിടികൂടി. സംഭവം ട്രെയിൻ യാത്രയിലെ സുരക്ഷിതത്വം സംബന്ധിച്ച് യാത്രക്കാരിൽ ആശങ്കകൾ സൃഷ്ടിച്ചിരിക്കുകയാണ്. മാസങ്ങൾക്ക് മുൻപ് പുനലൂർ റെയിൽവേസ്റ്റേഷൻ പരിസരത്ത് വെച്ച് സ്കൂൾ വിദ്യാർത്ഥിനിക്ക് പാമ്പുകടി എത്തിയിട്ടുണ്ട്.