വയനാട്പുനരധിവാസം; 3-ാം ഘട്ടം, 70 കുടുംബങ്ങള്‍

കല്‍പ്പറ്റ: വയനാട് ഉരുള്‍പ്പൊട്ടല്‍ ദുരന്തബാധിതരുടെ പുനരധിവാസത്തിന് വേണ്ടിയുള്ള മൂന്നാം ഘട്ട ലിസ്റ്റ് പ്രസിദ്ധീകരിച്ചു. 2 ബി ലിസ്റ്റാണ് പുറത്തുവന്നത്. 70 കുടുംബങ്ങളാണ് ഗുണഭോക്താക്കളുടെ മൂന്നാമത്തെ പട്ടികയിലുള്‍പ്പെട്ടിട്ടുള്ളത്. 

വാര്‍ഡ് 11 ല്‍ നിന്നും 37 കുടുംബങ്ങളും. വാര്‍ഡ് 10ല്‍ നിന്നും 18 കുടുംബങ്ങളും, വാര്‍ഡ് 12 ല്‍ നിന്നും 15 കുടുംബങ്ങളുമാണ് പട്ടികയിലുള്‍പ്പെട്ടത്. സുരക്ഷിതമല്ലാത്ത മേഖലക്ക് പുറത്ത് 50 മീറ്റര്‍ പരിധിയിലുള്ള ഒറ്റപ്പെട്ട കുടുംബങ്ങളാണ് ഇത്. പുനരധിവാസത്തിനുള്ള അവസാന കരട് പട്ടികയാണ് ഇന്ന് പുറത്ത് വിട്ടത്. പട്ടികയില്‍ ആക്ഷേപവും പരാതികളുമുണ്ടെങ്കില്‍ 10 ദിവസത്തിനുള്ളില്‍ അറിയിക്കാം. 

ആദ്യ രണ്ട് പട്ടികകള്‍ക്കെതിരെ വിമര്‍ശനവും പ്രതിഷേധവും ഉയരുന്നതിനിടെയാണ് മൂന്നാം ഘട്ട പട്ടിക പുറത്തിറക്കുന്നത്.  81 കുടുംബങ്ങളാണ് രണ്ടാംഘട്ട പട്ടികയില്‍ ഉള്‍പ്പെട്ടിരുന്നത്. ആദ്യഘട്ടത്തില്‍ 242 കുടുംബങ്ങളുടെ പട്ടികയും പ്രസിദ്ധീകരിച്ചിരുന്നു. 

കഴിഞ്ഞ ദിവസങ്ങളില്‍ പുനരധിവാസം വൈകുന്നതില്‍ പ്രതിഷേധിച്ച് മുണ്ടക്കൈ ചൂരല്‍മല ഉരുള്‍പൊട്ടല്‍ ദുരന്തബാധിതര്‍ ദുരന്തമേഖലയില്‍ കുടില്‍ കെട്ടി സമരമടക്കം നടത്തിയിരുന്നു. പുനരധിവാസം വൈകുന്നതിനൊപ്പം 5 സെന്റ് ഭൂമി മാത്രം നല്‍കുന്നതിലും കേന്ദ്ര സര്‍ക്കാര്‍ പാക്കേജ് പ്രഖ്യാപിക്കാത്തതിലും ദുരന്തബാധിതര്‍ക്ക് പ്രതിഷേധമുണ്ട്.