കാറ്റിനും മഴയ്ക്കും ശമനം, മാനം തെളിഞ്ഞു, പൊൻമുടി ഇന്ന് മുതൽ പ്രവർത്തിക്കും

തിരുവനന്തപുരം: പ്രതികൂല കാലാവസ്ഥയെത്തുടർന്ന് അടച്ചിട്ടിരുന്ന പൊൻമുടി ഇക്കോ ടൂറിസം ഇന്ന് (തിങ്കൾ) മുതൽ തുറന്നു പ്രവർത്തിക്കും.

 കഴിഞ്ഞ ദിവസങ്ങളിൽ തലസ്ഥാനത്തിന്‍റെ മലയോരങ്ങളിലടക്കം കനത്ത കാറ്റും മഴയും അനുഭവപ്പെട്ടതോടെയാണ് വെള്ളിയാഴ്ചയോടെ പൊൻമുടി ഇക്കോ ടൂറിസം ഉൾപ്പടെ അടച്ചിടാൻ തീരുമാനിച്ചത്.

 എന്നാൽ കാലാവസ്ഥയിൽ മാറ്റമുണ്ടായ സാഹചര്യത്തിൽ ഇന്ന് മുതൽ പൊന്മുടിയിലേക്ക് വിനോദ സഞ്ചാരികൾക്ക് പ്രവേശിക്കാൻ അനുമതി നൽകിയിരിക്കുകയാണ് വനം വകുപ്പ്.

വ്യാഴാഴ്ച രാത്രിയോടെ തലസ്ഥാനത്ത് മഴ ശക്തമായതോടെ ജില്ലയിൽ നാശനഷ്ടങ്ങളുടെ പരമ്പരയാണ് അരങ്ങേറിയത്.

 കുന്നും തീരവും ഉൾപ്പെടെയുള്ള ഇടങ്ങൾ മഴ കവർന്നു. പലയിടത്തും മരങ്ങൾ കടപുഴകി വീണു.

 ശക്തമായ കാറ്റിൽ വീടുകൾ ഭാഗികമായി തകർന്നു. പേപ്പാറ, നെയ്യാർ, അരുവിക്കര അണക്കെട്ടുകളിലും വാമനപുരം നദിയിലും ജലനിരപ്പുയർന്നു.

മലയോര മേഖലകളിൽ ഉൾവനത്തിൽ കനത്ത മഴ പെയ്യതതോടെ മണ്ണിടിച്ചിലിനും ഉരുൾപൊട്ടലിനുമുള്ള സാധ്യത കണക്കിലെടുത്താണ് വിനോദ സഞ്ചാര കേന്ദ്രങ്ങളിൽ നിയന്ത്രണം ഏർപ്പെടുത്തിയത്.

കനത്ത മഴയെ തുടർന്ന് ജില്ലയിലെ വിദ്യാഭ്യാസ സ്ഥാപനങ്ങൾക്കും വെള്ളിയാഴ്ച അവധി നൽകിയിരുന്നു.