യാക്കോബായ സഭ അധ്യക്ഷന്റെ വാഴിക്കല്‍ ചടങ്ങിനെതിരെ ഓര്‍ത്തഡോക്സ് സഭ

തിരുവനന്തപുരം: യാക്കോബായ സഭയുടെ അധ്യക്ഷന്റെ വാഴിക്കല്‍ ചടങ്ങ് സഭ തര്‍ക്കത്തിലെ സുപ്രിം കോടതി വിധിയുടെ ലംഘനമാണെന്ന് ഓര്‍ത്തഡോക്സ് സഭ കോട്ടയം ഭദ്രാസനാധിപന്‍ യൂഹാനോന്‍ മാര്‍ ദീയസ്‌ക്കോറോസ് മെത്രാപൊലീത്ത. 

കോട്ടയത്ത് നടത്തിയ വാര്‍ത്താ സമ്മേളനത്തിലാണ് അദ്ദേഹത്തിന്റെ വിമര്‍ശനം. നിയമവിരുദ്ധ പ്രവര്‍ത്തനത്തിന് സംസ്ഥാന സര്‍ക്കാര്‍ കൂട്ടുനില്‍ക്കുന്നുവെന്ന് വിമര്‍ശിച്ച അദ്ദേഹം ചടങ്ങില്‍ പങ്കെടുക്കാന്‍ മന്ത്രി പി രാജീവ് വിദേശത്ത് പോകുന്നത് വോട്ട് ബാങ്ക് ലക്ഷ്യമിട്ടാണെന്നും കുറ്റപ്പെടുത്തി.

സാമാന്തര ഭരണം പാടില്ലെന്നാണ് സുപ്രിം കോടതി വിധിയെന്ന് അദ്ദേഹം പറഞ്ഞു. വാഴിക്കല്‍ ചടങ്ങിലൂടെ യാക്കോബായ സഭ വിധി ചോദ്യം ചെയ്യുന്നു. ഇത് നിയമലംഘനമാണ്. യാക്കോബായ സഭയുടെ നിയമലംഘനത്തിന് സംസ്ഥാന സര്‍ക്കാര്‍ പൂര്‍ണ പിന്തുണ നല്‍കുന്നു. 

കേരളത്തിന്റെ നിയമമന്ത്രി പി രാജീവിന്റെ നേതൃത്വത്തില്‍ ഒരു സംഘം ലെബനോനില്‍ ചടങ്ങിന് പോകുന്നു. സംസ്ഥാന സര്‍ക്കാര്‍ ചെലവില്‍ പോകുന്ന സംഘം നിയമലംഘനത്തിന് കൂട്ടുനില്‍ക്കുകയാണ്. മലങ്കര സഭയിലെ സമാധാനത്തിന് വിള്ളല്‍ വീഴ്ത്തുന്ന നീക്കമാണിതെന്നും മെത്രാപൊലീത്ത കുറ്റപ്പെടുത്തി.

സംസ്ഥാന സര്‍ക്കാര്‍ സാമ്പത്തിക പ്രതിസന്ധിലാകുമ്പോഴാണ് ഇത്തരം യാത്രകളിലൂടെ അനാവശ്യ ചെലവുണ്ടാക്കുന്നത്. ആശ പ്രവര്‍ത്തകര്‍ക്ക് കൊടുക്കാന്‍ പണം ഇല്ലെന്ന് പറയുന്ന സര്‍ക്കാര്‍ നിയമ ലംഘനത്തിന് പണം ചെലവഴിക്കുകയാണ്. 

സംസ്ഥാനത്തെ നിയമ മന്ത്രി തന്നെ നിയമം ലംഘിക്കുന്നു. വോട്ട് ബാങ്ക് രാഷ്ട്രീയം മാത്രമാണ് ചിലരുടെ ലക്ഷ്യം. കേരളത്തിലെ പൊതുജനങ്ങളുടെ പണം എടുത്താണ് സര്‍ക്കാര്‍ പ്രതിനിധികളെ ചടങ്ങിന് അയക്കുന്നത്. നിയമ ലംഘനത്തിന് കുട പിടിക്കുന്ന സമീപനം സംസ്ഥാന സര്‍ക്കാര്‍ അവസാനിപ്പിക്കണമെന്നും അദ്ദേഹം ആവശ്യപ്പെട്ടു.