ക്ഷേത്രത്തിലെ ബലിക്കല്ലില്‍ അറിയാതെ ചവിട്ടിയാല്‍

ക്ഷേത്രദര്‍ശനം നടത്തുമ്പോള്‍ നമ്മളിലെല്ലാവരും ഒരിക്കലെങ്കിലും ബലിക്കല്ലില്‍ അറിയാതെ ചവിട്ടിയിട്ടുണ്ടാകും. ബലിക്കല്ലില്‍ ചവിട്ടിയാല്‍ പരിഹാരമില്ലാത്ത പാപമാണ് എന്നാണ് പലരുടെയും ധാരണ. അതുമൂലം എന്തെങ്കിലും ദോഷം സംഭവിക്കുമോ എന്നു പേടിച്ചു ജീവിക്കുന്ന ആളുകളും ഉണ്ട്.

സാധാരണയായി പുറത്തെയും അകത്തെയും പ്രദക്ഷിണ വഴികളിലാണ് ബലിക്കല്ലുകള്‍ ഉണ്ടാവുക.പ്രതിഷ്ഠയുടെ വികാരങ്ങളുടെ മൂര്‍ത്തിമദ്ഭാവങ്ങളാണ് ബലിക്കല്ലുകള്‍ എന്നാണ് ക്ഷേത്ര സങ്കല്‍പ്പത്തില്‍ പറയുന്നത്. ദൈവത്തിനു ചുറ്റും എപ്പോഴും ഊര്‍ജ വലയങ്ങള്‍ ഭ്രമണം ചെയ്തു കൊണ്ടിരിക്കുന്നുണ്ട്. നട വഴിയിലൂടെ ദൈവ ചൈതന്യ പ്രവാഹം നിരന്തരം പ്രസരിക്കുന്നതിനാലാണ് നടവഴിയിലൂടെ നമ്മള്‍ നടന്നു പോവാറുള്ളത്.

അതിനാലാണ് ക്ഷേത്രത്തിന്റെ അകവും പുറവും നടവഴിയും തിരിക്കുന്നിടത്ത് ബലിക്കല്ലുകള്‍ ഉള്ളത്.എന്നാല്‍ അത് പരിഹാരമില്ലാത്ത തെറ്റൊന്നുമല്ല എന്ന് മനസിലാക്കണം.ഇതുമൂലം ദോഷാനുഭവങ്ങള്‍ക്ക് സാക്ഷ്യമാകേണ്ടി വരികയുമില്ല. എന്നാല്‍ ബലിക്കല്ലില്‍ അറിയാതെ സ്പര്‍ശിക്കുന്നതിനു പരിഹാരമുണ്ട്.

മതില്‍ക്കെട്ട്, പുറത്തെ പ്രദിക്ഷണ വഴി, പുറബലി വട്ടം, ചുറ്റമ്പലം, .അകത്തെ പ്രദക്ഷിണ വഴി, അകബലി വട്ടം, ശ്രീകോവില്‍ എന്നീ ഏഴു ആവരണങ്ങളാണ് ക്ഷേത്രവിഗ്രഹത്തെ ആവരണം ചെയ്തിരിക്കുന്നത്. സാധാരണ പുറത്തെയും അകത്തെയും പ്രദക്ഷിണ വഴികളിലാണ് ബലിക്കല്ലുകള്‍ ഉണ്ടാവുക.

ദേവനു ചുറ്റും ഊര്‍ജവലയങ്ങള്‍ നിരന്തരം ഭ്രമണം ചെയ്തു കൊണ്ടിരിക്കുന്നതിനാല്‍ അവ മുറിഞ്ഞാല്‍ വികാരങ്ങളുടെ മൂര്‍ത്തികളായ ഗന്ധര്‍വ്വന്മാര്‍ നമ്മെ ബാധിക്കുന്നു എന്നാണ് വിശ്വാസം. എന്നാല്‍ നടവഴിയിലൂടെ ദേവചൈതന്യ പ്രവാഹം നിരന്തരം പുറത്തേക്കു പ്രസരിക്കുന്നതിനാല്‍ നടവഴിയിലൂടെ കടന്നുപോകാമെന്നതിനാലാണ് ക്ഷേത്ര പ്രദക്ഷിണത്തിനായി നിശ്ചിതമായ ഒരു നടവഴി നിര്‍ദേശിക്കപ്പെട്ടിട്ടുള്ളത്.

പരസ്പരം ബന്ധിച്ചു നിന്നു ദേവനിലേക്ക് അന്തര്‍മുഖരായി ധ്യാനാവസ്ഥയില്‍ കഴിയുന്ന മൂര്‍ത്തികളായ ബലിക്കല്ലുകളെ പ്രദക്ഷിണത്തിനിടെ ഇടമുറിഞ്ഞും ചവുട്ടിയും ധ്യാനം തടസപ്പെടുത്തരുതെന്നാണ് ശാസ്ത്രം.ഇതിനാലാണ് ബലിക്കല്ല് അറിയാതെ ചവിട്ടുകയോ, പരിഹാരമായി തൊട്ടു തലയില്‍ വയ്ക്കുകയോ ചെയ്യരുതെന്നു പറയുന്നത്. ഭക്തര്‍ക്ക് തൊടാനുള്ളതല്ല ബലിക്കല്ല് എന്ന യാഥാര്‍ഥ്യം ഓരോരുത്തരും മനസിലാക്കിയിരിക്കണം.

അറിയാതെ ബലിക്കല്ലില്‍ സ്പര്‍ശിക്കാനിടയായാല്‍ പരിഹാരമായി കരചരണകൃതം വാക്കായജം കര്‍മ്മജം വാ ശ്രവണ നയനജം വാ മാനസംവാപരാധം വിഹിതമിഹിതം വാ സര്‍വ്വമേതല്‍ ക്ഷമസ്വ ശിവശിവ കരുണാബ് ധോ ശ്രീമഹാ ദേവശം ഭോ ഈ മന്ത്രം മൂന്നു വട്ടം ജപിച്ചാല്‍ മതിയാകുമെന്നാണ് പുരാണങ്ങളില്‍ പറയുന്നത് .

ഇതോടെ ബലിക്കല്ലില്‍ ചവുട്ടിയ അപരാധം നീങ്ങിക്കിട്ടും. അറിയാതെ പോലും ബലിക്കല്ലില്‍ ചവിട്ടിയാല്‍ ഒരിക്കലും ബലിക്കല്ല് തൊട്ടു തലയില്‍ വയ്ക്കരുത്. ഈ മന്ത്രജപത്തിനു ശേഷം മൂര്‍ത്തിയെ മനസില്‍ സ്മരിച്ച് സര്‍വാപരാധം ക്ഷമിക്കണം എന്നു പ്രാര്‍ഥിക്കുക.