ഥാറിന് വന്‍ വിലക്കിഴിവുമായി മഹീന്ദ്ര...

രാജ്യത്തെ ജനപ്രിയമായ ലൈഫ്സ്റ്റൈല്‍ എസ്യുവികളില്‍ ഒന്നാണ് മഹീന്ദ്ര ഥാര്‍. ജൂണ്‍ 7 വരെ ഇന്ത്യയില്‍ ലഭ്യമായ ഏറ്റവും വിലകുറഞ്ഞ 4×4 എസ്യുവിയായിരുന്നു ഇത്. എന്നാല്‍ കഴിഞ്ഞയാഴ്ച മാരുതി സുസുക്കി ജിംനിയുടെ വില വെളിപ്പെടുത്തിയതോടെ സ്ഥാിതിയില്‍ ഒരു മാറ്റമുണ്ടായി.

മാരുതി സുസുക്കി ജിംനി 5-ഡോര്‍ ഇപ്പോള്‍ ഇന്ത്യയില്‍ 12.74 ലക്ഷം രൂപ പ്രാരംഭ എക്‌സ്-ഷോറൂം വിലയില്‍ ലഭ്യമാണ്. ജിംനി 4×4 സ്റ്റാന്‍ഡേര്‍ഡ് മോഡല്‍ ഇപ്പോള്‍ രാജ്യത്തെ ഏറ്റവും വിലകുറഞ്ഞ 4×4 എന്ന ബാഡ്ജ് സ്വന്തമാക്കി.

അതേസമയം മഹീന്ദ്ര ഥാര്‍ ജിംനിക്ക് കടുത്ത മത്സരം നല്‍കുമെന്ന് പ്രതീക്ഷിക്കുന്നുണ്ടെങ്കിലും, അതിന്റെ ജനപ്രീതിയ്ക്ക് തിരിച്ചടിയുണ്ടാകാന്‍ സാധ്യതയില്ല. മഹീന്ദ്ര ഥാര്‍ സ്വന്തമാക്കാന്‍ ആഗ്രഹിക്കുന്നവരുണ്ടെങ്കില്‍ ഇതാണ് ശരിയായ സമയം. കാരണം എസ്യുവി 65,000 രൂപ വരെ കിഴിവില്‍ ലഭ്യമാണ്.

രാജ്യത്തുടനീളമുള്ള ചില മഹീന്ദ്ര ഷോറൂമുകള്‍ പുതിയ ഥാറിന് 65,000 രൂപ വരെ കിഴിവ് വാഗ്ദാനം ചെയ്യുന്നതായി കാര്‍ വേല്‍ റിപ്പോര്‍ട്ട് ചെയ്യുന്നു. തിരഞ്ഞെടുത്ത ഡീലര്‍ഷിപ്പുകള്‍ നല്‍കുന്ന മഹീന്ദ്ര ഥാറിന് 65,000 രൂപ കിഴിവ് ഓഫറില്‍ 40,000 രൂപ ക്യാഷ് ഡിസ്‌കൗണ്ടും 25,000 രൂപ എക്സ്ചേഞ്ച് ബോണസും ഉള്‍പ്പെടുന്നു.

മഹീന്ദ്ര ഥാറിന്റെ ക്യാഷ് ഡിസ്‌കൗണ്ടും എക്സ്ചേഞ്ച് ബോണസും നിങ്ങളുടെ സ്ഥലത്തെയും നിങ്ങള്‍ തിരഞ്ഞെടുക്കുന്ന വേരിയന്റിനെയും ആശ്രയിച്ചിരിക്കുന്നു.മഹീന്ദ്ര ഥാറിന്റെ വില അടുത്തിടെ ഇന്ത്യയില്‍ 1.05 ലക്ഷം രൂപ വരെ വര്‍ധിപ്പിച്ചിരുന്നു. ഡീസല്‍-മാനുവല്‍ ഹാര്‍ഡ്-ടോപ്പ് RWD ഉള്ള മഹീന്ദ്ര ഥാറിന്റെ ഏറ്റവും വിലകുറഞ്ഞ വേരിയന്റിന് ഇപ്പോള്‍ 55,000 രൂപ കൂടുതലാണ്.

മഹീന്ദ്ര ഥാറിന്റെ എല്‍എക്സ് ഡീസല്‍-മാനുവല്‍ ഹാര്‍ഡ്-ടോപ്പ് റിയര്‍-വീല്‍ ഡ്രൈവ് വേരിയന്റിന് 1.05 ലക്ഷം രൂപയുടെ ഏറ്റവും ഉയര്‍ന്ന വിലവര്‍ദ്ധനയുണ്ടായി. മഹീന്ദ്ര ഥാറിന്റെ ഏറ്റവും ജനപ്രിയമായ വേരിയന്റാണിത്.

മഹീന്ദ്ര ഥാറിന്റെ 4WD വേരിയന്റിന് ഇപ്പോള്‍ 13.49 ലക്ഷം മുതല്‍ 16.77 ലക്ഷം രൂപ വരെയാണ് വില. അടുത്ത വര്‍ഷം പുതിയ 5-ഡോര്‍ ഥാര്‍ ഇന്ത്യയില്‍ അവതരിപ്പിക്കാനുള്ള തയ്യാറെടുപ്പിലാണ് മഹീന്ദ്ര ആന്‍ഡ് മഹീന്ദ്ര.

ഈ ആഴ്ച ആദ്യമാണ് മാരുതി സുസുക്കി അതിന്റെ എതിരാളിയായ അഞ്ച് ഡോര്‍ ജിംനി എസ്യുവി ഇന്ത്യയില്‍ അവതരിപ്പിച്ചത്. അടിസ്ഥാന മോഡലിന് 12.74 ലക്ഷം രൂപ (എക്‌സ്-ഷോറൂം) ആണ് എസ്യുവിയുടെ വില . 2023 ജനുവരിയില്‍ നടന്ന ഓട്ടോ എക്സ്പോയിലാണ് മാരുതി സുസുക്കി ജിംനി ആദ്യമായി ബുക്കിംഗ് ആരംഭിച്ചത്. കമ്പനി ഇപ്പോള്‍ എസ്യുവിയുടെ ഡെലിവറി ആരംഭിച്ചു കഴിഞ്ഞു.