ധനലക്ഷ്മി ബാങ്കിന് 21.73 കോടി രൂപ ലാഭം

തൃശൂര്‍: ധനലക്ഷ്മി ബാങ്കിന് നടപ്പുവര്‍ഷത്തെ ഒക്ടോബര്‍-ഡിസംബര്‍ മൂന്നാംപാദത്തില്‍ 21.73 കോടി രൂപ ലാഭം. 54.31 കോടി രൂപയാണ് പ്രവര്‍ത്തനലാഭം. നടപ്പുവര്‍ഷം ആദ്യ 9 മാസക്കാലത്തെ പ്രവര്‍ത്തനലാഭം 84.64 കോടി രൂപയാണ്.

മൊത്തം വരുമാനം 6.66 ശതമാനം ഉയര്‍ന്ന് 834.25 കോടി രൂപയായി. 797.13 കോടി രൂപയാണ് പലിശവരുമാനം; വര്‍ദ്ധന 16.93 ശതമാനം. അറ്റ പലിശവരുമാനത്തോത് 2.94 ശതമാനത്തില്‍ നിന്ന് 3.65 ശതമാനത്തിലേക്കും മെച്ചപ്പെട്ടു.

മൊത്തം ബിസിനസ് 12.88 ശതമാനം ഉയര്‍ന്ന് 22,?183 കോടി രൂപയായി. മൊത്തം നിക്ഷേപം 6.93 ശതമാനവും കറന്റ്/സേവിംഗ്സ് അക്കൗണ്ട് നിക്ഷേപം 5.26 ശതമാനവും ഉയര്‍ന്നു.

മൊത്തം വായ്പ 22.42 ശതമാനം മുന്നേറി 9,?244 കോടി രൂപയായി. ചെറുകിട-സൂക്ഷ്മ വായ്പകളില്‍ 52.77 ശതമാനമാണ് വര്‍ദ്ധന. സ്വര്‍ണവായ്പകള്‍ 23.05 ശതമാനവും ഉയര്‍ന്നു.

മൊത്തം നിഷ്‌ക്രിയ ആസ്തി 7.55 ശതമാനത്തില്‍ നിന്ന് 5.83 ശതമാനത്തിലേക്കും അറ്റ നിഷ്‌ക്രിയ ആസ്തി 3.83 ശതമാനത്തില്‍ നിന്ന് 1.82 ശതമാനത്തിലേക്കും കുറഞ്ഞിട്ടുണ്ട്. 12.52 ശതമാനമാണ് മൂലധന പര്യാപ്തത.