ഇന്ത്യയിലെ അതിസമ്പന്നരായ സ്ത്രീകളുടെ പട്ടികയില്‍ ഇടംപിടിച്ച് മലയാളികള്‍

ഇന്ത്യയിലെ അതിസമ്പന്നരായ സ്ത്രീകളുടെ പട്ടികയില്‍ മലയാളികളും.മലയാളികളായ വിദ്യ വിനോദ്, അലീഷാ മൂപ്പന്‍, ഷീല കൊച്ചൗസേപ്പ് എന്നിവരാണ് 100 ഇന്ത്യന്‍ സമ്പന്ന വനിതകളുടെ പട്ടികയില്‍ ഇടം പിടിച്ചത്.കൊട്ടക് പ്രൈവറ്റ് ബാങ്കിംഗും ഹുറൂണ്‍ ഇന്ത്യയും ചേര്‍ന്ന് കഴിഞ്ഞ ദിവസമാണ് രാജ്യത്തെ അതിസമ്പന്നയായ വനിതകളുടെ പട്ടിക പുറത്തു വിട്ടത്.2021 ഡിസംബര്‍ 31 വരെയുള്ള മൊത്തം ആസ്തി നോക്കിയാണ് പട്ടിക തയ്യാറാക്കിയത്.

ദുബായ് കേന്ദ്രീകരിച്ച് പ്രവര്‍ത്തിക്കുന്ന സ്റ്റഡി വേള്‍ഡ് എജ്യുക്കേഷന്‍ കമ്പനിയുടെ സ്ഥാപകയും സിഇഒയുമാണ് വിദ്യ വിനോദ്.2,780 കോടിയാണ് അവരുടെ ആസ്തി. പട്ടികയില്‍ ഇരുപത്തി ഒന്നാം സ്ഥാനത്താണ് വിദ്യ. വി-സ്റ്റാര്‍ മാനേജിംഗ് ഡയറക്ടര്‍ ഷീലാ കൊച്ചൗസേപ്പ് ചിറ്റിലപ്പിള്ളിയ്ക്ക് 540 കോടിയുടെ ആസ്തിയുണ്ട്. പട്ടികയില്‍ 54മതാണ് ഷീലാ കൊച്ചൗസേപ്പ്. ആസ്റ്റര്‍ ഡിഎം ഹെല്‍ത്ത് കെയര്‍ ഡെപ്യൂട്ടി എംഡിയാണ് അലീഷാ മൂപ്പന്‍.ലിസ്റ്റില്‍ അറുപത്തി രണ്ടാം സ്ഥാനത്തുള്ള അലിഷാ മൂപ്പന് 410 കോടിയുടെ ആസ്തിയുണ്ട്.

അതിസമ്പന്നരായ സ്ത്രീകളുടെ പട്ടികയില്‍ റോഷ്നി നാടാര്‍ മല്‍ഹോത്ര തുടര്‍ച്ചയായി രണ്ടാം തവണയും ഒന്നാം സ്ഥാനം നിലനിര്‍ത്തി. 84,330 കോടിയാണ് റോഷ്നിയുടെ വരുമാനം. റോഷ്നിയെ പിന്തുടര്‍ന്ന് രണ്ടാം സ്ഥാനത്തെത്തിയ ഫാല്‍ഗുനി നായര്‍, ബയോകോണ്‍ ചെയര്‍പേഴ്സണ്‍ കിരണ്‍ മജുംദാര്‍ ഷായെ പിന്തള്ളി. 57,520 കോടി രൂപയാണ് ഇവരുടെ 2021ലെ ആസ്തി.

പട്ടികയില്‍ മൂന്നാമത് 29,030 കോടിയുടെ ആസ്തിയുമായി ബയോകോണ്‍ സി ഇ ഒയും സ്ഥാപകയുമായ കിരണ്‍ മസുംദാര്‍ ഷായാണ് . നീലിമ മൊതപാര്‍ടിയാണ് നാലാം
സ്ഥാനത്ത് . 28180 കോടി രൂപയാണ് നീലിമയുടെ ആസ്തി.

സോഹോ സ്ഥാപകനായ ശ്രീധര്‍ വെമ്പുവിന്റെ സഹോദരി രാധാ വെമ്പു ആണ് അഞ്ചാം സ്ഥാനത്ത്. 26,260 കോടി രൂപയാണ് രാധയുടെ ആസ്തി. ആഗോള ഫാര്‍മസ്യൂട്ടിക്കല്‍ ബയോടെക്‌നോളജി കമ്പനിയായ യു എസ് വി യുടെ ലീന ഗാന്ധി തിവാരിയാണ് ആറാം സ്ഥാനത്ത്. 24,280 കോടി രൂപയാണ് ഇവരുടെ ആസ്തി.