സോവറിന്‍ ഗോള്‍ഡ് ബോണ്ട് വില്‍പന ആരംഭിച്ചു

ന്യൂഡല്‍ഹി: സോവറിന്‍ ഗോള്‍ഡ് ബോണ്ട്(എസ്ജിബി) വില്‍പന ആരംഭിച്ചു. റിസര്‍വ് ബാങ്കിന്റെ ഈ സാമ്പത്തിക വര്‍ഷത്തിലെ മൂന്നാംഘട്ട എസ്ജിബി വില്‍പനയാണിത്. ഈ മാസം 22 വരെ അപേക്ഷിക്കാം. ഈ വര്‍ഷം ഇതുവരെ സ്വര്‍ണവിലയിലുണ്ടായ വര്‍ധന 10 ശതമാനത്തിലേറെയാണ്. സ്വര്‍ണത്തില്‍ ഡിജിറ്റലായി നടത്തുന്ന നിക്ഷേപമാണിത്. സ്വര്‍ണത്തിന്റെ വിപണി മൂല്യം മച്യുരിറ്റി തുകയായി ലഭിക്കും. പ്രതിവര്‍ഷം 2.5% പലിശ ഇതിലൂടെ ലഭിക്കും.

ഗ്രാമിന് 6199 രൂപയാണ് ബോണ്ടിന്റെ ഇഷ്യൂ വില. ഓണ്‍ലൈനായി വാങ്ങുമ്പോള്‍ ഗ്രാമിന് 50 രൂപ ഇളവു ലഭിക്കും. 8 വര്‍ഷമാണ് ബോണ്ടുകളുടെ കാലാവധി. അഞ്ചാം വര്‍ഷം മുതല്‍ നിക്ഷേപങ്ങള്‍ പിന്‍വലിക്കാം. കാലാവധിക്കുശേഷം പിന്‍വലിച്ചാല്‍ മൂലധനനേട്ടനികുതി ഒഴിവാകും.

ഇന്ത്യന്‍ പൗരത്വമുള്ള ആര്‍ക്കും ഗോള്‍ഡ് ബോണ്ട് വാങ്ങാം. ഒരു ഗ്രാം മുതല്‍ നിക്ഷേപം നടത്താം. ഇത്തരത്തില്‍ ഒരു വര്‍ഷം 4 കിലോഗ്രാം വരെ (വ്യക്തികള്‍ക്ക്) സ്വര്‍ണം വാങ്ങാം. ട്രസ്റ്റുകള്‍ക്ക് 20 കിലോഗ്രാം വരെയും. ബാങ്കുകള്‍, സ്റ്റോക്ക് ഹോള്‍ഡിങ് കോര്‍പറേഷന്‍ ഓഫ് ഇന്ത്യ ലിമിറ്റഡ്, ക്ലിയറിങ് കോര്‍പറേഷന്‍ ഓഫ് ഇന്ത്യ ലിമിറ്റഡ്, സ്റ്റോക് എക്‌സ്‌ചേഞ്ചുകള്‍, പോസ്റ്റ് ഓഫിസുകള്‍ എന്നിവ വഴി ബോണ്ട് വാങ്ങാവുന്നതാണ്.