മദ്യപാനത്തിനിടെ തർക്കം; തിരുവനന്തപുരത്ത് സുഹൃത്തിനെ വെട്ടിക്കൊന്ന് യുവാവ്

തിരുവനന്തപുരം: തിരുവനന്തപുരം കമലേശ്വരത്ത് സുഹൃത്തിനെ യുവാവ് വെട്ടിക്കൊന്നു. കമലേശ്വരം സ്വദേശി സുജിത്ത് ആണ് കൊല്ലപ്പെട്ടത്. സുഹൃത്ത് ജയനെ പൂന്തുറ പൊലീസ് കസ്റ്റഡിയിലെടുത്തു.ഇരുവരും ഒരുമിച്ച് മദ്യപിക്കുന്നതിനിടെയുണ്ടായ തർക്കമാണ് കൊലപാതകത്തിനു പിന്നിലെന്ന് പൊലീസ് പറഞ്ഞു.

ആര്യംകുഴിയിലെ ഒറ്റമുറി വീട്ടിൽ ബുധനാഴ്ച രാത്രിയാണ് സംഭവം നടന്നത്. കൊലപാതകം നടത്തിയ ശേഷം പ്രതി മൃതദേഹം കുളിപ്പിച്ചു കിടത്തി. ശേഷം സ്റ്റേഷനിൽ എത്തി കീഴടങ്ങുകയായിരുന്നു. ക്രിമിനൽ പശ്ചാത്തലം ഉള്ളയാളാണ് പ്രതിയെന്നാണ് വിവരം.