തുടര്‍ച്ചയായ ലൈംഗിക അതിക്രമം; യുവാവിനെ കഴുത്തറുത്ത് കൊലപ്പെടുത്തി 14കാരന്‍

ഡല്‍ഹി: ദക്ഷിണ ഡല്‍ഹിയില്‍ ലൈംഗിക അതിക്രമം ചെയ്ത യുവാവിനെ കഴുത്തറുത്ത് കൊലപ്പെടുത്തി 14കാരന്‍. ബാട്ട്‌ല ഹൗസ് മേഖലയില്‍ മുഹമ്മദ് വസീം (26) ആണ് കൊല്ലപ്പെട്ടത്.

ശനിയാഴ്ചയാണ് കൊലപാതകത്തെക്കുറിച്ച് പൊലീസ് വെളിപ്പെടുത്തല്‍ നടത്തിയതെന്നാണ് ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നു. യുവാവ് കഴിഞ്ഞ രണ്ട് മാസത്തോളമായി 14കാരനെ ലൈംഗികമായി ദുരുപയോഗിക്കുകയും പീഡിപ്പിക്കുകയുമായിരുന്നു.

വീഡിയോ എടുത്ത് ഭീഷണിപ്പെടുത്തിയതോടെ യുവാവിനെ കൊലപ്പെടുത്താന്‍ 14കാരന്‍ തീരുമാനിക്കുകയായിരുന്നു. സംഭവത്തില്‍ 14 കാരനെ പിടികൂടിയതായി ഡെപ്യൂട്ടി കമ്മീഷണര്‍ രാജേഷ് ഡിയോ വിശദമാക്കി.

ജുവനൈല്‍ നിയമ പ്രകാരമുള്ള നിയമ നടപടികള്‍ കേസില്‍ സ്വീകരിച്ചതായും ദക്ഷിണ ഡല്‍ഹി ഡിഎസ്പി വിശദമാക്കി.ഓഗസ്റ്റ് 30 ന് ഉച്ചയ്ക്ക് രണ്ട് മണിയോടെയാണ് ജാമിയ നഗര്‍ പൊലീസിന് കൊലപാതക വിവരം ലഭിച്ചത്.

ബാട്ട്‌ല ഹൌസ് മേഖലയിലെ ജാമിയ നഗറിലെ ഫ്‌ലാറ്റിലാണ് രക്തത്തില്‍ കുളിച്ച നിലയില്‍ യുവാവിന്റെ മൃതദേഹം കണ്ടെത്തിയത്. യുവാവിന്റെ കഴുത്തില്‍ ആഴമേറിയ മുറിവുണ്ടായിരുന്നു.

നിരന്തരമായ പീഡനത്തില്‍ 14 കാരന്‍ പേപ്പര്‍ കട്ടര്‍ കയ്യില്‍ കരുതിയിരുന്നു. ഇത് വച്ച് ശനിയാഴ്ച 14കാരന്‍ യുവാവിനെ ആക്രമിക്കുകയായിരുന്നു. 26കാരന്റെ കുടുംബത്തിന്റെ ഉടമസ്ഥതയിലുള്ള കെട്ടിടം വാടകയ്ക്ക് നല്‍കിയിരുന്നതായിരുന്നു.

ഏതാനും ദിവസം മുന്‍പായിരുന്നു കെട്ടിടത്തില്‍ ആളൊഴിഞ്ഞത്. സക്കീര്‍ നഗറിലെ വീട്ടില്‍ കുടുംബത്തിനൊപ്പമായിരുന്നു യുവാവ് താമസിച്ചിരുന്നത്.