/kalakaumudi/media/agency_attachments/zz0aZgq8g5bK7UEc9Bb2.png)
/kalakaumudi/media/post_banners/1c0231895c0c2be24bcf723ea6ba61b28cba7891a3ae03a9c27b0ddd5389d15c.jpg)
തിരുവനന്തപുരം: ഓര്‍ഡര്‍ ചെയ്ത എല്ലാ സാധനങ്ങളും പാര്‍സലില്‍ കിട്ടിയില്ല എന്നാരോപിച്ച് ഹോട്ടല്‍ ഉടമയെ വെട്ടി പരിക്കേല്‍പ്പിച്ച ആറംഗ സംഘത്തിലെ 4 പേര്‍ പിടിയില്‍. വെട്ടൂര്‍ സ്വദേശി റിക്കാസ് മോന്‍, കോരാണി സ്വദേശി ഉണ്ണി എന്ന് വിളിക്കുന്ന ബിജു, പാലച്ചിറ സ്വദേശി കിട്ടൂസ്, ശ്രീക്കുട്ടന്‍ എന്ന് വിളിക്കുന്ന ശ്രീജിത്ത് എന്നിവരെയാണ് വര്‍ക്കല പൊലീസ് അറസ്റ്റ് ചെയ്തത്.
വര്‍ക്കല ആര്‍ ടി ഒ ഓഫീസിന് സമീപം പ്രവര്‍ത്തിക്കുന്ന സംസം ഹോട്ടല്‍ ഉടമ നൗഷാദി(47)നാണ് വെട്ടേറ്റത്. കഴിഞ്ഞ ഡിസംബര്‍ 17 ന് രാത്രിയിലാണ് സംഭവം.
നൗഷാദിന്റെ ഹോട്ടലില്‍ നിന്നും സംഭവം നടക്കുന്നതിന് തലേന്ന് സംഘം ഭക്ഷണം പാര്‍സല്‍ വാങ്ങിയിരുന്നു. ഓര്‍ഡര്‍ ചെയ്ത എല്ലാ സാധനങ്ങളും പാര്‍സലില്‍ ഉണ്ടായിരുന്നില്ല എന്നാരോപിച്ച് ഹോട്ടലില്‍ എത്തിയ ഇവര്‍ നൗഷാദുമായി വാക്ക് തര്‍ക്കമുണ്ടായി.
തുടര്‍ന്ന് ഹോട്ടല്‍ അടയ്ക്കുന്ന സമയത്ത് ഹോട്ടലില്‍ വീണ്ടുമെത്തി അസഭ്യം വിളിക്കുകയും മര്‍ദ്ദിക്കുകയും ചെയ്തു.പൊലീസില്‍ വിവരമറിയിക്കാന്‍ ശ്രമിച്ചപ്പോള്‍ നൗഷാദിന്റെ മൊബൈല്‍ ഇവര്‍ പിടിച്ചു വാങ്ങുകയും വീണ്ടും ക്രൂരമായി മര്‍ദ്ദിക്കുകയും ചെയ്തു.
തുടര്‍ന്ന് പ്രതികള്‍ കയ്യില്‍ കരുതിയിരുന്ന ഒന്നര അടി നീളമുള്ള ഇരുതല മൂര്‍ച്ചയുള്ള വെട്ടുകത്തി കൊണ്ട് തലയ്ക്ക് വെട്ടുകയായിരുന്നു. പരിക്കേറ്റ നൗഷാദ് നിലവില്‍ ചികിത്സയിലാണ്. ഒളിവിലായിരുന്ന പ്രതികളില്‍ 4 പേരെയാണ് ഇപ്പോള്‍ പിടികൂടിയത്. 2 പേര്‍ ഒളിവിലാണ്.