ഇടുക്കിയില്‍ ഭാര്യാപിതാവിനെ വെട്ടികൊലപ്പെടുത്തി; ഭാര്യയ്ക്കും വെട്ടേറ്റു, യുവാവ് കസ്റ്റഡിയില്‍

ഇടുക്കി: ഇടുക്കി നെടുംകണ്ടം കൗന്തിയില്‍ മരുമകന്‍ ഭാര്യാപിതാവിനെ വെട്ടികൊലപ്പെടുത്തി. പുതുപ്പറമ്പില്‍ ടോമി ആണ് കൊല്ലപ്പെട്ടത്. സംഭവത്തില്‍ ഇദ്ദേഹത്തിന്റെ മരുമകന്‍ ജോബിന്‍ തോമസിനെ പൊലീസ് കസ്റ്റഡിയിലെടുത്തു.

ജോബിന്റെ ഭാര്യയും ടോമിയുടെ മകളുമായ ടിന്റുവിനേയും ആക്രമിച്ചു. ജോബിന്‍ ടിന്റുവിനെയും കത്തികൊണ്ട് ആക്രമിക്കുകയായിരുന്നു. വെട്ടേറ്റ് ഗുരുതരമായി പരിക്കേറ്റ ടിന്റുവിനെ കോട്ടയം മെഡിക്കല്‍ കോളജില്‍ പ്രവേശിപ്പിച്ചു.

ടിന്റുവിന്റെ ആരോഗ്യനില ഗുരുതരമായി തുടരുകയാണ്. കുടുംബ കലഹമാണ് കൊലപാതകത്തിലേക്ക് നയിച്ചതെന്നാണ് പൊലീസ്  സംശയിക്കുന്നത്.

സംഭവത്തില്‍ കേസെടുത്ത പൊലീസ് അന്വേഷണം ആരംഭിച്ചു.ബെംഗളൂരുവില്‍ കച്ചവടം ചെയ്തുവരുകയായിരുന്നു ജോബിന്‍. ദീര്‍ഘ നാളായി ഭാര്യ ടിന്റുവും ജോബിനും തമ്മില്‍ തര്‍ക്കമുണ്ടായിരുന്നു.

ഇരുവരും അകന്നുകഴിയുകയായിരുന്നു. ഇന്നലെ അര്‍ധരാത്രിക്കുശേഷമാണ് നെടുംകണ്ടം കൗന്തിയിലെ ടോമിയുടെ വീട്ടിലെത്തി ജോബിന്‍ ആക്രമണം നടത്തിയത്.