ഹോളിവുഡ് ബോക്‌സ് ഓഫീസിനെ നിരാശയിലാഴ്ത്തി 'ദ മാര്‍വല്‍സ്'. മാര്‍വല്‍ സിനിമാറ്റിക് യൂണിവേഴ്‌സിന്റെ ഏറ്റവും പുതിയ ചിത്രമാണ് 'ദ മാര്‍വല്‍സ്'.

'മിസ് മാര്‍വലി'ന്റെ തുടര്‍ച്ചയായെത്തിയ ചിത്രം നാല് ദിവസം കൊണ്ട് നോര്‍ത്ത് അമേരിക്കയില്‍ നിന്ന് മാത്രം നേടിയത് 46.11 മില്ല്യണ്‍ യുഎസ് ഡോളറാണ്. ആഗോള തലത്തില്‍ ചിത്രം 102.2 മില്ല്യണ്‍ യുഎസ് ഡോളറും നേടിയതായി ബോക്‌സ് ഓഫീസ് മോജോയുടെ റിപ്പോര്‍ട്ടില്‍ പറയുന്നു. എന്നാല്‍ നിര്‍മ്മാണ ചെലവിന്റെ പകുതി പോലും എത്തിക്കാന്‍ ചിത്രത്തിന് ഇതുവരെയും കഴിഞ്ഞിച്ചിട്ടില്ല. 274.80 മില്ല്യണ്‍ ഡോളര്‍ ബജറ്റില്‍ പുറത്തിറങ്ങിയ ചിത്രമാണ് ദ മാര്‍വല്‍സ്.

ചിത്രത്തിന് ലാഭമുണ്ടാകണമെങ്കില്‍ ആഗോളതലത്തില്‍ 440 മില്ല്യണ്‍ യുഎസ് ഡോളര്‍ എങ്കിലും കളക്ഷന്‍ നേടണം. വമ്പന്‍ ബജറ്റില്‍ നിര്‍മ്മിക്കുന്ന എംസിയുവിന്റെ 33ാമത്തെ ചലച്ചിത്രമാണ് ദ മാര്‍വല്‍സ്.

മാര്‍വലിന്റെ വനിത സൂപ്പര്‍ ഹീറോകളുടെ ഒന്നിക്കലാണ് ചിത്രം പറയുന്നത്. ക്യാപ്റ്റന്‍ മാര്‍വല്‍,മോണിക്ക റാംബോ, മിസ് മാര്‍വലായ കമലാ ഖാന്‍, നിക് ഫ്യൂരി എന്നീ എംസിയു കഥാപാത്രങ്ങളും മാര്‍വല്‍സിന്റെ ഭാഗമാകുന്നുണ്ട്. 2023 നവംബര്‍ 10നാണ് ചിത്രം ആഗോള വ്യാപകമായി റിലീസ് ചെയ്തത്. ഇന്ത്യയില്‍ ഇംഗ്ലീഷ്, ഹിന്ദി, തമിഴ്, തെലുങ്ക് ഭാഷകളിലും 'ദ മാര്‍വല്‍സ്' തിയേറ്ററുകളിലെത്തിയിരുന്നു.