തെലുങ്ക് നടന്‍ ചന്ദ്രമോഹന്‍ അന്തരിച്ചു

ഹൈദരാബാദ്: തെലുങ്ക് നടന്‍ മല്ലമ്പള്ളി ചന്ദ്രമോഹന്‍(82) അന്തരിച്ചു. ജൂബിലി ഹില്‍സിലെ സ്വകാര്യ ആശുപത്രിയില്‍ ഇന്ന് രാവിലെ 9.45 ഓടെയായിരുന്നു അന്ത്യം. ഏറെ കാലമായി ഹൃദയ സംബന്ധമായ അസുഖങ്ങളെ തുടര്‍ന്ന അദ്ദേഹം ചികിത്സയിലായിരുന്നു.

1943 മെയ് 23 ന് ആന്ധ്രാപ്രദേശിലെ കൃഷ്ണ ജില്ലയിലെ പാമിഡിമുക്കുള ഗ്രാമത്തിലാണ് അദ്ദേഹത്തിന്റെ ജനനം. ചന്ദ്രശേഖര റാവു മല്ലമ്പള്ളി എന്നാണ് ചന്ദ്രമോഹന്റെ യഥാര്‍ത്ഥ പേര്.

1966ല്‍ രംഗുല രത്‌നം എന്ന ചിത്രത്തിലൂടെ കരിയര്‍ ആരംഭിച്ചത്. പിന്നീട് 600ന് മുകളില്‍ ചിത്രങ്ങളില്‍ ചെറുതും വലുതുമായ വേഷങ്ങള്‍ ചെയ്തു. 'പടഹരല്ല വയസു' എന്ന ചിത്രത്തിലെ അഭിനയത്തിന് ചന്ദ്ര മോഹന്‍ മികച്ച നടനുള്ള ഫിലിംഫെയര്‍ അവാര്‍ഡ് (1979) നേടി.

1987-ല്‍ ചന്ദമാമ രാവേ എന്ന ചിത്രത്തിന് നന്ദി അവാര്‍ഡ് നേടി. അത്തനോക്കാടെ എന്ന ചിത്രത്തിലെ സഹനടനെന്ന നിലയിലും നന്ദി അവാര്‍ഡ് ചന്ദ്രമോഹന്‍ നേടി.ഓക്സിജനാണ് ചന്ദ്രമോഹന്റെ അവസാന ചിത്രം.