യുവജനങ്ങൾക്ക് മുഖ്യമന്ത്രിയുമായി സംവദിക്കാൻ അവസരം; 'മുഖാമുഖം' ചൊവ്വാഴ്ച തിരുവനന്തപുരത്ത്

തിരുവനന്തപുരം: നവകേരള സൃഷ്ടിക്കായി പൊതുജനങ്ങളുടെ അഭിപ്രായങ്ങളും കാഴ്ചപ്പാടുകളും സ്വരൂപിക്കുന്നതിന്റെ ഭാഗമായി യുവജനങ്ങളുമായി മുഖ്യമന്ത്രി പിണറായി വിജയൻ സംവദിക്കുന്ന മുഖാമുഖം പരിപാടി തിരുവനന്തപുരത്ത് നടക്കും. രാവിലെ 9.30 മുതൽ ഉച്ചയ്ക്ക് ഒരു മണി വരെ കവടിയാർ ഉദയ് പാലസ് കൺവെൻഷൻ സെന്ററിലാണ് പരിപാടി നടക്കുക. മുഖാമുഖത്തിൽ സമൂഹത്തിന്റെ നാനാതുറകളെ പ്രതിനിധീകരിക്കുന്ന യുവജനങ്ങൾ മുഖ്യമന്ത്രിയുമായി സംവദിക്കും.

ഇതിനായുള്ള രജിസ്ട്രേഷൻ രാവിലെ എട്ടിന് ആരംഭിച്ചിട്ടുണ്ട്.തുടർന്ന് 9.30ന് യുവജനകാര്യ മന്ത്രി സജി ചെറിയാൻ അധ്യക്ഷത വഹിക്കുന്ന ചടങ്ങിൽ മുഖ്യമന്ത്രി പിണറായി വിജയൻ പരിപാടി ഉദ്ഘാടനം ചെയ്യും. മന്ത്രിമാരായ ജി ആർ അനിൽ, വി ശിവൻകുട്ടി, വി അബ്ദുറഹിമാൻ, എ എ റഹീം എംപി, മേയർ ആര്യാ രാജേന്ദ്രൻ, വി കെ പ്രശാന്ത് എംഎൽഎ തുടങ്ങിയവർ പങ്കെടുക്കും. രാവിലെ 8.30 ന് രാജേഷ് ചേർത്തല അവതരിപ്പിക്കുന്ന ഫ്യൂഷനുമുണ്ടാകും.