/kalakaumudi/media/agency_attachments/zz0aZgq8g5bK7UEc9Bb2.png)
ന്യൂഡല്‍ഹി: ദീപാവലി ആഘോഷങ്ങക്കായി മണ്‍ചെരാതുകളില്‍ 22 ലക്ഷം ദീപങ്ങള്‍ തെളിയിച്ച് ലോക റെക്കോര്‍ഡിട്ട് അയോധ്യ.
അയോധ്യ രാമക്ഷേത്രവും ദീപങ്ങളാല്‍ അലങ്കരിച്ചു. 51 ഘട്ടങ്ങളിലായാണ് 22.23 ലക്ഷം ദീപങ്ങള്‍ ഒരേസമയം കത്തിച്ചത്. ഇതോടെ സ്വന്തം റെക്കോര്‍ഡ് തകര്‍ക്കാന്‍ അയോധ്യയ്ക്ക് കഴിഞ്ഞു.
ഗവര്‍ണര്‍ ആനന്ദിബെന്‍ പട്ടേല്‍, മുഖ്യമന്ത്രി യോഗി ആദിത്യനാഥ് എന്നിവരുള്‍പ്പെട്ട ചടങ്ങിലാണ് ലോക റെക്കോര്‍ഡ് പ്രഖ്യാപിച്ചത്. 50 രാജ്യങ്ങളില്‍ നിന്നുള്ള അതിഥികളും ചടങ്ങില്‍ പങ്കെടുക്കാന്‍ എത്തി. ദീപോത്സവത്തോട് അനുബന്ധിച്ച് സാംസ്‌കാരിക പരിപാടികളും സര്‍ക്കാര്‍ സംഘടിപ്പിച്ചു.
അയോധ്യയിലെ ദീപോത്സവത്തിന്റെ ഏഴാം പതിപ്പാണ് ഈ വര്‍ഷത്തേത്. 2017ല്‍ യോഗി ആദിത്യനാഥിന്റെ നേതൃത്വത്തിലുള്ള സര്‍ക്കാര്‍ രൂപീകരിച്ചതോടെയാണ് അയോധ്യയില്‍ ദീപോത്സവം ആഘോഷങ്ങള്‍ ആരംഭിച്ചത്. ആ വര്‍ഷം ഏകദേശം 51,000 ദീപങ്ങള്‍ കത്തിച്ചു. 2019ല്‍ ദീപങ്ങളുടെ എണ്ണം 4.10 ലക്ഷമായി ഉയര്‍ന്നു. 2020ല്‍ ഇത് ആറ് ലക്ഷത്തിലധികവും 2021ല്‍ ഒന്‍പത് ലക്ഷത്തിലേറെദീപങ്ങളും കത്തിച്ചു. 2023ല്‍ 15 ലക്ഷം ദീപങ്ങള്‍ കത്തിച്ചാണ് റെക്കോര്‍ഡ് സ്വന്തമാക്കിയത്. ഇപ്പോള്‍ ആ റെക്കോര്‍ഡാണ് തിരുത്തി എഴുതിയിരിക്കുന്നത്.
ദീപോത്സവത്തില്‍ നേരിട്ടെത്താതെ ദീപം തെളിയിക്കാനും ഇത്തവണ സൗകര്യം ഉണ്ടായിരുന്നു. 'ഹോളി അയോധ്യ' മൊബൈല്‍ ആപ്പ് വഴിയും 101 രൂപയ്ക്ക് ഒരു ദീപം മുതല്‍ 1100 രൂപ 51 ദീപം വരെയുള്ള പാക്കേജുകളാണുണ്ടായിരുന്നത്. ഓണ്‍ലൈനായി പണമടയ്ക്കുമ്പോള്‍ അവരുടെ പേരില്‍ ദീപം തെളിയിക്കുന്നതാണ് സംവിധാനം. പാക്കേജനുസരിച്ച് ചെരാത്, ക്ഷേത്രപ്രസാദം, രാമക്ഷേത്രമാതൃക, സരയൂതീര്‍ഥം എന്നിവയും ഭക്തര്‍ക്ക് ലഭ്യമാക്കി.