/kalakaumudi/media/agency_attachments/zz0aZgq8g5bK7UEc9Bb2.png)
ഭോപാല്‍: നിയമസഭാ തിരഞ്ഞെടുപ്പ് നടക്കാനിരിക്കുന്ന മൂന്ന് സംസ്ഥാനങ്ങളിലെ ആദ്യഘട്ട സ്ഥാനാര്‍ത്ഥി പട്ടിക കോണ്‍ഗ്രസ് പുറത്തുവിട്ടു. മധ്യപ്രദേശ്, ഛത്തീസ്ഗഢ്, തെലങ്കാന എന്നീ സംസ്ഥാനങ്ങളുടെ നിയമസഭ തിരഞ്ഞെടുപ്പിന്റെ ആദ്യഘട്ട സ്ഥാനാര്‍ത്ഥി പട്ടികയാണ് പുറത്തുവിട്ടത്. ഛത്തീസ്ഗഢില്‍ ആദ്യ പട്ടികയില്‍ 30 സ്ഥാനാര്‍ത്ഥികളാണുളളത്. പഠാനില്‍ മുഖ്യമന്ത്രി ഭൂപേഷ് ബാഗേലാണ് സ്ഥാനാര്‍ത്ഥി. ഉപമുഖ്യമന്ത്രി ടി എസ് സിംഗ് ദിയോ അംബികാപൂരില്‍ മത്സരിക്കും.
ഗിരീഷ് ദേവാങ്കനെയാണ് പാര്‍ട്ടി രാജ്‌നന്ദ്ഗാവില്‍ മത്സരിപ്പിക്കുന്നത്. ബിജെപി നേതാവും മുന്‍ മുഖ്യമന്ത്രിയുമായ രമണ്‍ സിങ്ങാകും എതിര്‍ സ്ഥാനാര്‍ത്ഥി. ബിജാപൂരില്‍ നിന്ന് വിക്രം മാണ്ഡവി, ബസ്തറില്‍ നിന്ന് ലഖേശ്വര്‍ ബാഗേല്‍, ചിത്രകോട്ടില്‍ നിന്ന് ദീപക് ബൈജി, കെ ചവീന്ദ്ര കര്‍മ്മ ദന്തേവാഡ എന്നിവര്‍ മത്സരിക്കും.
കോണ്‍ഗ്രസ് നേതാവ് താരധ്വജ് സാഹു ദുര്‍ഗ് (റൂറല്‍) മണ്ഡലത്തിലും രവീന്ദ്ര ചൗബെ നവഗഢിലും യശോദ വര്‍മ ഖൈരാഗഡിലും മത്സരിക്കും.
മധ്യപ്രദേശില്‍ ആദ്യ പട്ടികയില്‍ 144 സ്ഥാനാര്‍ത്ഥികളാണുള്ളത്. മധ്യപ്രദേശ് മുന്‍ മുഖ്യമന്ത്രി കമല്‍നാഥ് ചിന്ദ്വാരയില്‍ നിന്ന് മത്സരിക്കും. തെലങ്കാനയിലെ ആദ്യ ഘട്ട സ്ഥാനാര്‍ത്ഥി പട്ടികയില്‍ എ രേവന്ത് റെഡ്ഡി (കൊടങ്കല്‍), എന്‍ ഉത്തം കുമാര്‍ റെഡ്ഡി (ഹുസൂര്‍നഗര്‍), കോമാട്ടിറെഡ്ഡി വെങ്കട്ട് റെഡ്ഡി (നല്‍ഗൊണ്ട), മുളഗില്‍ നിന്നുള്ള സീതക്ക എന്നിവര്‍ ഇടംപിടിക്കാന്‍ സാധ്യതയുണ്ട്.
119 സീറ്റിലേക്കാണ് തെലങ്കാനയില്‍ തിരഞ്ഞെടുപ്പ് നടക്കുന്നത്. വോട്ടെടുപ്പ് നവംബര്‍ 30ന് ആണ്.മധ്യപ്രദേശില്‍ 230 ഉം ചത്തീസ്ഗഢില്‍ 90 സീറ്റുകളിലേക്കുമാണ് തിരഞ്ഞെടുപ്പ്. നവംബര്‍ 17 ന് ആണ് മധ്യപ്രദേശില്‍ വോട്ടെടുപ്പ്. ചത്തീസ്ഗഢില്‍ ഒന്നാംഘട്ട തിരഞ്ഞെടുപ്പ് നവംബര്‍ ഏഴിനും രണ്ടാംഘട്ടം നവംബര്‍ 17 നും നടക്കും.