/kalakaumudi/media/agency_attachments/zz0aZgq8g5bK7UEc9Bb2.png)
/kalakaumudi/media/post_banners/28e4dcec04507f4c253f6f28747fa28bfc2a91146dd8b59d9b8b1fdf04126770.jpg)
തിരുവനന്തപുരം: സര്‍ക്കാര്‍-ഗവര്‍ണര്‍ തകര്‍ക്കം തെരുവിലേക്ക്. ഗവര്‍ണര്‍ ആരിഫ് മുഹമ്മദ് ഖാനെതിരെ തലസ്ഥാനത്ത് കരിങ്കൊടി വീശി പ്രതിഷേധം. സംഭവത്തില്‍ 19 എസ്എഫ്‌ഐ പ്രവര്‍ത്തകരെ പൊലീസ് കസ്റ്റഡിയിലെടുത്തു.
തിങ്കളാഴ്ച വൈകിട്ട് രാജ്ഭവനില്‍ നിന്ന് വിമാനത്താവളത്തിലേക്ക് പോകുമ്പോഴായിരുന്നു ഗവര്‍ണര്‍ക്കെതിരെ പ്രതിഷേധിച്ചത്. മൂന്ന് സ്ഥലത്താണ് കരിങ്കൊടി വീശിയത്.
പാളയത്ത് ഗവര്‍ണറുടെ വാഹനത്തില്‍ അടിച്ചടക്കം പ്രതിഷേധിച്ച് ഏഴ് പേരെയും തിരുവനന്തപുരം ജനറല്‍ ആശുപത്രിക്ക് സമീപത്ത് വച്ച് പ്രതിഷേധിച്ച ഏഴ് പേരെയും പേട്ടയില്‍ പ്രതിഷേധിച്ച അഞ്ച് പേരെയുമാണ് കസ്റ്റഡിയിലെടുത്തത്.
സര്‍വകലാശാല സെനറ്റിലേക്ക് ബിജെപി ബന്ധമുള്ളവരെ തിരുകിക്കയറ്റിയ ഗവര്‍ണറുടെ നടപടിക്കെതിരെയായിരുന്നു എസ്എഫ്‌ഐ പ്രതിഷേധം. പേട്ട പള്ളിമുക്കില്‍ വച്ച് എസ്എഫ്‌ഐ പ്രവര്‍ത്തകരുടെ പ്രതിഷേധത്തില്‍ കോപാകുലനായ ഗവര്‍ണര്‍ ആരിഫ് ഖാന്‍, കാറില്‍ നിന്ന് പുറത്തിറങ്ങി. പൊലീസുകാരോട് അടക്കം ഗവര്‍ണര്‍ ദേഷ്യപ്പെട്ടു.
തന്നെ കായികമായി കൈയേറ്റം ചെയ്യാനുള്ള ഗൂഢാലോചനയാണെന്നും ഇതിന് പിന്നില്‍ മുഖ്യമന്ത്രി പിണറായി വിജയനാണെന്നും അദ്ദേഹം ആരോപിച്ചു.
സംസ്ഥാനത്ത് ഗുണ്ടാ രാജാണ് നടക്കുന്നതെന്ന് അദ്ദേഹം ആരോപിച്ചു. തനിക്കെതിരെ പ്രതിഷേധിക്കുന്നത് ക്രിമിനലുകളാണെന്നു പറഞ്ഞ ഗവര്‍ണര്‍ പ്രതിഷേധക്കാരെ ബ്ലഡി ക്രിമിനല്‍സ് എന്നു വിളിക്കുകയും ചെയ്തു.