സംസ്ഥാനത്തിന്റെ നികുതി വിഹിതവും കേന്ദ്രസഹായമുള്ള പദ്ധതികളിലെ സഹായവും കേന്ദ്രം വെട്ടിക്കുറയ്ക്കുന്നു: കെ എന്‍ ബാലഗോപാല്‍

തിരുവനന്തപുരം: സംസ്ഥാനത്തിന്റെ നികുതി വിഹിതവും കേന്ദ്രസഹായമുള്ള പദ്ധതികളിലെ സഹായവും കേന്ദ്രം വെട്ടിക്കുറയ്ക്കുന്നുവെന്ന് ധനമന്ത്രി കെ എന്‍ ബാലഗോപാല്‍. സംസ്ഥാനത്തിന് നല്‍കേണ്ടുന്ന 57,400 കോടി രൂപ കേന്ദ്രം നിഷേധിക്കുകയാണെന്നും അദ്ദേഹം ചൂണ്ടിക്കാട്ടി. സംസ്ഥാനം സാമ്പത്തിക പ്രതിസന്ധി നേരിടുന്നുണ്ടെന്നും ചിലവുകള്‍ കുറയുകയല്ല വര്‍ധിക്കുകയാണെന്നും അദ്ദേഹം വ്യക്തമാക്കി.

കടമെടുക്കല്‍ പരിധി 19,000 കോടി രൂപ കുറച്ചപ്പോള്‍, റവന്യൂ ഗ്രാന്റ് കഴിഞ്ഞ വര്‍ഷത്തെ അപേക്ഷിച്ച് 8,400 കോടി രൂപയായും കുറഞ്ഞു. 12,000 കോടി രൂപയുടെ ജിഎസ്ടി നഷ്ടപരിഹാരവും സംസ്ഥാനത്തിന് നഷ്ടമായി. 15-ാം ധനകാര്യ കമ്മീഷനു കീഴിലുള്ള നികുതി വിഹിതം 3.58% ല്‍ നിന്ന് 1.925% ആയി കുറഞ്ഞതോടെ സംസ്ഥാനത്തിന് മറ്റൊരു 18,000 കോടി രൂപ കൂടി നഷ്ടമാകുമെന്ന് അദ്ദേഹം ചൂണ്ടിക്കാട്ടി.

2017 മുതല്‍ കേരളത്തിന്റെ മൊത്ത വായ്പാ പരിധിയില്‍ 1.07 ലക്ഷം കോടി രൂപയുടെ കുറവാണ് രേഖപ്പെടുത്തിയിരിക്കുന്നത്. റവന്യൂ ചെലവ് 2021-ല്‍ 1,19,930 കോടി രൂപയായിരുന്നു. എന്നാല്‍ ഇത് 2022-23 വര്‍ഷത്തില്‍ 1,43,129 കോടി രൂപയായി ഉയര്‍ന്നു. കഴിഞ്ഞ കുറച്ച് വര്‍ഷങ്ങളായി, സംസ്ഥാനം സ്വന്തം റവന്യൂ സ്രോതസ്സുകളില്‍ നിന്നാണ് കൂടുതല്‍ ചെലവുകള്‍ വഹിക്കുന്നത്. ഈ സാമ്പത്തിക വര്‍ഷത്തെ ചെലവിന്റെ 80% വഹിക്കാന്‍ സംസ്ഥാനത്തിന് സ്വന്തം വരുമാനം നല്‍കേണ്ട സാഹചര്യമാണ് നിലവിലുള്ളതെന്നും മന്ത്രി പറഞ്ഞു.

'ഈ സാമ്പത്തിക യാഥാര്‍ത്ഥ്യങ്ങള്‍ അംഗീകരിക്കാതെ നമുക്ക് മുന്നോട്ട് പോകാന്‍ കഴിയില്ല. സംസ്ഥാനത്തിന്റെ നികുതി വിഹിതവും സഹായവും കേന്ദ്രം വെട്ടിക്കുറയ്ക്കുകയാണ്. കേന്ദ്ര സഹായ പദ്ധതികള്‍, വിഴിഞ്ഞം തുറമുഖം പോലുള്ള അടിസ്ഥാന സൗകര്യ വികസന പദ്ധതികള്‍ എന്നിവ സര്‍ക്കാര്‍ ഗ്യാരണ്ടിയില്‍ വായ്പയെടുത്ത് പൂര്‍ത്തിയാക്കാന്‍ സംസ്ഥാനത്തിന് അനുമതിയില്ല, 'എന്നും അദ്ദേഹം കൂട്ടിച്ചേര്‍ത്തു.

കഴിഞ്ഞ സാമ്പത്തിക വര്‍ഷം ജിഡിപിയുടെ 6.8% കേന്ദ്ര സര്‍ക്കാര്‍ കടമെടുത്തപ്പോള്‍ കേരളത്തിന് അനുവദിച്ചത് 2.5% മാത്രമാണ്. അതേസമയം, സംസ്ഥാനത്തിന്റെ റവന്യൂ ഗ്രേഡ് 0.9% ആയി കുറച്ചു. ഇത് സംസ്ഥാന സര്‍ക്കാര്‍ ആരംഭിച്ച ധന ഏകീകരണ നടപടികളുടെ വിജയത്തെ വ്യക്തമാക്കുന്നു എന്നും അദ്ദേഹം വ്യക്തമാക്കി.