​ഗോത്രസംസ്കാരത്തെ അടുത്തറിയാം; 'ഗോത്ര ഗ്രാമം' പദ്ധതിയുമായി കേരള ടൂറിസം വകുപ്പ്

ഇടുക്കി: ‍സംസ്ഥാനത്ത് 'ഗോത്ര ഗ്രാമം' പദ്ധതി നടപ്പാക്കാനൊരുങ്ങി കേരള ടൂറിസം വകുപ്പ്. ഉത്തരവാദിത്ത ടൂറിസം മിഷനും ഇടുക്കി ജില്ലാ ടൂറിസം പ്രൊമോഷൻ കൗൺസിലും (ഡി.ടി.പി.സി) സംയുക്തമായാണ് പദ്ധതി നടപ്പിലാക്കുക. കേരളത്തിന്റെ ഗോത്ര സംസ്കാരത്തെ അന്താരാഷ്ട്രതലത്തിൽ പരിചയപ്പെടുത്തുന്ന പദ്ധതിയാണ് ഇത്.

പദ്ധതി പ്രാബല്യത്തിൽ വരുന്നതോടെ വിനോദസഞ്ചാരികൾക്ക് വംശീയ സമൂഹങ്ങളുടെ വാസസ്ഥലങ്ങളിലേക്ക് കടക്കാതെ തന്നെ സംസ്ഥാനത്തിന്റെ വംശീയ സംസ്കാരം അനുഭവിക്കാൻ കഴിയും. മാത്രമല്ല വംശീയ സമൂഹങ്ങളുടെ ജീവിതത്തിനും ആവാസവ്യവസ്ഥയ്ക്കും തടസ്സമാകുകയുമില്ല.

പദ്ധതി പ്രകാരം ഡിടിപിസിയുടെ രണ്ട് ഏക്കർ സ്ഥലത്ത് ഒരു വംശീയ ഗ്രാമം സ്ഥാപിക്കും. അവിടെ സംസ്ഥാനത്തെ വിവിധ ആദിവാസി സമൂഹങ്ങളുടെ പരമ്പരാഗത കലാരൂപങ്ങളും പാചകരീതികളും കരകൗശലവസ്തുക്കളും മറ്റ് സാംസ്കാരിക പ്രകടനങ്ങളും പ്രദർശിപ്പിക്കും. രണ്ട് ഘട്ടങ്ങളുള്ള പദ്ധതിയുടെ ആദ്യഘട്ടത്തിനായി 1.27 കോടി രൂപ സംസ്ഥാന സർക്കാർ അനുവദിച്ചു.

ഗോത്രവർഗക്കാരുടെ വീടുകളുടെ മാതൃകയിലുള്ള താമസ സൗകര്യങ്ങൾ 'വംശീയ ഗ്രാമത്തിൽ' ഉണ്ടായിരിക്കും. എന്നാൽ ചുറ്റുമതിലോടുകൂടിയ സ്ഥലത്ത് ആധുനിക സൗകര്യങ്ങളോടെ ടൂറിസം പ്രവർത്തന മേഖലയും താമസ സൗകര്യവും ഉണ്ടാകും.

കേരളത്തിന്റെ വംശീയ സംസ്‌കാരത്തിന്റെ തനത് സവിശേഷതകൾ ലോകത്തിന് മുന്നിൽ അവതരിപ്പിക്കുന്നതാണ് ഈ സംരംഭമെന്ന് ടൂറിസം മന്ത്രി പി എ മുഹമ്മദ് റിയാസ് പറഞ്ഞു.ഒപ്പം വംശീയ സമൂഹങ്ങളുടെ ജീവിതശൈലി, ആവാസവ്യവസ്ഥ, പൈതൃകം എന്നിവ സംരക്ഷിക്കാനും പദ്ധതി സഹായിക്കുമെന്നും മന്ത്രി കൂട്ടിച്ചേർത്തു.