'പാർട്ടിയിൽ നിന്ന് പിന്തുണയില്ല, തന്നെ വഞ്ചിച്ചയാളെ നേതൃത്വം സഹായിക്കുന്നു'; നടി ഗൗതമി ബിജെപി വിട്ടു

ചെന്നൈ: ബിജെപിയിൽ നിന്ന് രാജിവെക്കുന്നതായി പ്രഖ്യാപിച്ച് നടി ഗൗതമി.
പാർട്ടി തന്നെ പിന്തുണയ്ക്കുന്നില്ലെന്നും സീറ്റ് നല്‍കാതെ കബളിപ്പിച്ചുവെന്നും ആരോപിച്ചാണ് രാജി. തന്‍റെ പണം തട്ടിയെടുത്ത അളഗപ്പനെ പാര്‍ട്ടി പിന്തുണയ്ക്കുന്നുവെന്നും, അതെസമയം നീതി നിര്‍വഹണത്തില്‍ ഇപ്പോഴും തമിഴ്നാട് സര്‍ക്കാരില്‍ വിശ്വാസമുണ്ടെന്നും അവര്‍ വ്യക്തമാക്കി. 25 കോടിയുടെ സ്വത്ത് തിരിമറി നടത്തിയെന്നാണ് അളഗപ്പനെതിരെയുള്ള ആരോപണം.

2021 ലെ നിയമസഭാ തിരഞ്ഞെടുപ്പിൽ രാജപാളയം മണ്ഡലത്തിന്റെ വികസനം ബിജെപിക്ക് വേണ്ടി ഏൽപ്പിച്ചിട്ടുണ്ടെന്നും ആ സീറ്റിൽ മത്സരിക്കാമെന്ന് വാഗ്ദാനം ചെയ്തിട്ടുണ്ടെന്നും , അവസാന നിമിഷം പാർട്ടി തീരുമാനം പിൻവലിച്ചെങ്കിലും പാർട്ടിയോടുള്ള പ്രതിബദ്ധത താൻ നിലനിർത്തിയെന്നും അവർ പറയുന്നു.

25 വർഷമായി പാർട്ടിയെ വിശ്വസിച്ചിട്ടും, പൂർണ പിന്തുണയുടെ അഭാവമുണ്ടെന്നും മാത്രമല്ല, ബിജെപിയിലെ നിരവധി മുതിർന്ന അംഗങ്ങൾ എഫ്‌ഐആറുകൾ ഫയൽ ചെയ്തതിന് ശേഷവും അളഗപ്പനെ കേസിൽ നിന്ന് ഒഴിവാക്കാനും ഒളിച്ചോടാനും പ്രാപ്തനാക്കുന്നുവെന്നും ഗൗതമി ആരോപിച്ചു.

ഭാരതീയ ജനതാ പാർട്ടിയുടെ അംഗത്വം രാജിവയ്ക്കാൻ തീരുമാനിച്ചത് കഠിനമായ ഹൃദയത്തോടും കടുത്ത നിരാശയോടും കൂടിയാണ്. 25 വർഷം മുമ്പ് പാർട്ടിയിൽ ചേർന്നത് രാഷ്ട്രനിർമ്മാണത്തിനായുള്ള ശ്രമങ്ങൾക്ക് തന്റേതായ സംഭാവന നൽകാനാണെന്നും ഗൗതമി പറഞ്ഞു.

മുഖ്യമന്ത്രിയും പോലീസ് വകുപ്പും നീതിന്യായ സംവിധാനവും വിജയിക്കുമെന്നും നീതി തനിക്ക് നൽകുമെന്നും ഇപ്പോഴും പ്രതീക്ഷയുണ്ട്. വളരെ വേദനയോടും സങ്കടത്തോടും കൂടിയാണ് രാജിക്കത്ത് എഴുതുന്നതെന്നും ഗൗതമി കൂട്ടിച്ചേർത്തു.