ഞങ്ങളുടെ ജീവിതം പൂര്‍ണ്ണമാക്കാന്‍ ഞങ്ങളുടെ മാവിയെത്തി; നെയ്മറിന് പെണ്‍കുഞ്ഞ് പിറന്നു

ബ്രസീലിയ: ബ്രസീലിയന്‍ താരം നെയ്മറിനും പങ്കാളി ബ്രൂണ ബിയാന്‍കാര്‍ഡിയ്ക്കും പെണ്‍കുഞ്ഞ് പിറന്നു. കുഞ്ഞിന് 'മാവി'യെന്നാണ് പേരിട്ടിരിക്കുന്നത്. കുഞ്ഞ് പിറന്നെന്ന സന്തോഷ വാര്‍ത്ത അവരുടെ ഇന്‍സ്റ്റഗ്രാം അക്കൗണ്ടിലൂടെയാണ് പുറത്തുവിട്ടത്.

'ഞങ്ങളുടെ ജീവിതം പൂര്‍ണ്ണമാക്കാന്‍ ഞങ്ങളുടെ മാവിയെത്തി. സ്വാഗതം മകളേ. ഇതിനോടകം തന്നെ നീ ഞങ്ങള്‍ക്ക് വളരെ പ്രിയപ്പെട്ടവളായിക്കഴിഞ്ഞു. ഞങ്ങളെ തിരഞ്ഞെടുത്തതിന് നന്ദി', കുഞ്ഞിനൊപ്പമുള്ള ചിത്രങ്ങള്‍ പങ്കുവെച്ച് നെയ്മറും ബ്രൂണയും കുറിച്ചു. ചിത്രത്തിന് താഴെ നിരവധി പേരാണ് ആശംസകള്‍ അറിയിച്ച് എത്തിയിരിക്കുന്നത്.

നെയ്മര്‍ തന്റെ പങ്കാളി ബ്രൂണ ഗര്‍ഭിണിയാണെന്ന വിവരം ഏപ്രിലിലാണ് സമൂഹമാധ്യമങ്ങളിലൂടെ പങ്കുവച്ചത്. മോഡലും സോഷ്യല്‍ മീഡിയ ഇന്‍ഫ്‌ളുവന്‍സറുമാണ് 29കാരിയായ ബ്രൂണ. സൂപ്പര്‍ താരം നെയ്മറുടെ രണ്ടാമത്തെ കുഞ്ഞാണിത്. ആദ്യ പങ്കാളി കരോലിന ഡാന്റാസില്‍ താരത്തിന് 12 വയസുള്ള മകനുണ്ട്.