ഔദ്യോഗിക പ്രഖ്യാപനം വന്നു; ഗിൽ ഗുജറാത്തിന്റെ ക്യാപ്റ്റൻ, ഹാർദിക് മുംബൈയിലേക്ക്

ഗുജറാത്ത് ടൈറ്റൻസിന്റെ ക്യാപ്റ്റൻ ആയി യുവതാരം ശുഭ്മൻ ഗിൽ നിയമിക്കപ്പെട്ടു. ഇതു സംബന്ധിച്ച ഔദ്യോഗിക പ്രഖ്യാപനം തിങ്കളാഴ്ച വന്നു. ഹാർദിക് പാണ്ഡ്യ മുംബൈ ഇന്ത്യൻസിലേക്ക് പോയതായും ഗുജറാത്ത് ടൈറ്റൻസ് സ്ഥിരീകരിച്ചു. കാഷ് ഇൻ ട്രേഡിൽ ആണ് ഹാർദിക് മുംബൈയിലേക്ക് പോവുന്നത്. 15 കോടിയോളം മുംബൈ ഇന്ത്യൻസ് ഗുജറാത്തിന് നൽകും.

മുംബൈ ഇന്ത്യൻസിൽ ദീർഘകാലം കളിച്ചിട്ടുള്ള ഹാർദിക് രണ്ട് സീസൺ മുമ്പ് ആയിരുന്നു ഗുജറാത്ത് ടൈറ്റൻസിന്റെ ക്യാപ്റ്റൻ ആയത്. ഗുജറാത്തിന് ഒരു ഐ പി എൽ കിരീടം നേടിക്കൊടുക്കാനും ഒരു ഫൈനലിൽ എത്തിക്കാനും ഹാർദികിന് ആയിരുന്നു.

ഐ പി എൽ ചരിത്രത്തിലെ ഏറ്റവും വലിയ ട്രേഡ് ആകും ഇത്. ഇത്ര വലിയ തുകയ്ക്ക് ഒരു ക്ലബും ഇതുവരെ ഐ പി എല്ലിൽ താരത്തെ കൈമാറ്റം ചെയ്തിട്ടില്ല.

ഹാർദിക് ഗുജറാത്ത് ടൈറ്റൻസിനൊപ്പം രണ്ട് സീസണിൽ നിന്ന് 833 റൺസും 11 വിക്കറ്റും വീഴ്ത്തിയിട്ടുണ്ട്. ഹാർദിക് നേരത്തെ മുംബൈ ഇന്ത്യൻസിനൊപ്പം നാലു ഐ പി എൽ കിരീടങ്ങളും നേടിയിട്ടുണ്ട്.