ടെസ്റ്റ് പരമ്പരയിലെ കോലിയുടെ അഭാവം; വെളിപ്പെടുത്തലുമായി സുഹൃത്ത്

മുംബൈ: ഇംഗ്ലണ്ടിനെതിരായ ടെസ്റ്റ് പരമ്പരയില്‍ വിരാട് കോലിയുടെ പിന്മാറ്റത്തിന്റെ പിന്നിലെ കാരണങ്ങളില്‍ പല ഊഹാപോഹങ്ങള്‍ ഉണ്ടായിരുന്നു. വിരാട് കോലിയുടെ സ്വകാര്യതയെ മാനിക്കണമെന്നും അദ്ദേഹത്തിന്റെ വ്യക്തിപരമായ കാര്യങ്ങളില്‍ ഊഹാപോഹങ്ങലില്‍ നിന്ന് വിട്ട് നില്‍ക്കാന്‍ ബിസിസിഎ അഭ്യര്‍ത്ഥിച്ചിരുന്നു.

ദക്ഷിണാഫ്രിക്കന്‍ ഇതിഹാസവും കോലിയുടെ അടുത്ത സുഹൃത്തുമായ എ ബി ഡിവില്ലിയേഴ്‌സ് ടെസ്റ്റ് പരമ്പരയില്‍ താരത്തിന്റെ അഭാവത്തിന്റെ കാരണത്തെ കുറിച്ച് വെളിപ്പെടുത്തി. വിരാട് കോലിയും ബോളിവുഡ് നടിയും ഭാര്യയുമായ അനുഷ്‌ക ശര്‍മയും വീണ്ടും അച്ഛനും അമ്മയും ആകാന്‍ പോകുകയാണെന്ന് ഡിവില്ലിയേഴ്‌സ് വ്യക്തമായി.

വിരാട് കോലിയുടെ അമ്മയ്ക്ക് അസുഖമായതിനാലാണ് കോലി വിട്ടു നില്‍ക്കുന്നതെന്ന വാര്‍ത്തകള്‍ പ്രചരിക്കുകയും കോലിയുടെ സഹോദരന്‍ വികാസ് കോലി ഇത് നിഷേധിച്ച് രംഗത്തു വരികയും ചെയ്തിരുന്നു. ഇതിന് പിന്നാലെയാണ് ഡിവില്ലിയേഴ്‌സ് വിരാട് കോലി വീണ്ടും അച്ഛനാവാന്‍ പോകുന്നുവെന്ന വാര്‍ത്ത പുറത്തുവിട്ടത്.

ആദ്യ രണ്ട് ടെസ്റ്റില്‍ കോലി കളിക്കാതിരുന്നുപ്പോള്‍ എന്തു പറ്റി അസുഖം വല്ലതുമുണ്ടോ എന്ന് ചോദിച്ച് താന്‍ സന്ദേശം അയച്ചിരുന്നുവെന്നും എന്നാല്‍ താന്‍ സുഖമായിരിക്കുന്നുവെന്നും കുടുംബത്തോടൊപ്പം കുറച്ചു സമയം ചെലവഴിക്കേണ്ടതുകൊണ്ടാണ് മാറി നില്‍ക്കുകയാണെന്നും കോലി മറുപടി നല്‍കിയെന്ന് ഡിവില്ലിയേഴ്‌സ് പറഞ്ഞു. അവര്‍ രണ്ടുപേരും രണ്ടാമത്തെ കുട്ടിയുടെ വരവിനായി കാത്തിരിക്കുകയാണ്. ഈ സമയും കുടുംബത്തോടൊപ്പം ചെലവഴിക്കാനാണ് അദ്ദേഹം ആഗ്രഹിക്കുന്നത്. അതാണിപ്പോള്‍ അദ്ദേഹത്തിന് പ്രധാനം.

നിങ്ങള്‍ നിങ്ങളോട് തന്നെ സത്യസന്ധരായില്ലെങ്കില്‍ ജീവിതം തന്നെ വഴി മാറി പോകും. കുടുംബമില്ലെങ്കില്‍ പിന്നെ മറ്റെന്ത് ഉണ്ടായിട്ടും കാര്യമില്ലല്ലോ. അതുകൊണ്ടുതന്നെ അക്കാര്യം കൊണ്ട് മാത്രം വിരാടിന്റെ കാര്യത്തില്‍ വിധിയെഴുതരുത്. ശരിയാണ് അദ്ദേഹത്തിന്റെ സാന്നിധ്യം നമുക്ക് മിസ് ചെയ്യുന്നുണ്ട്. പക്ഷെ അദ്ദേഹമിപ്പോള്‍ എടുത്തിരിക്കുന്നത് ശരിയായ തീരുമാനമാണ്-ഡിവില്ലിയേഴ്‌സ് പറഞ്ഞു.