മെസ്സിയുടെ ബുള്ളറ്റ് ഗോള്‍; ഷൂട്ടൗട്ടില്‍ നാഷ് വില്ലയെ തകര്‍ത്തു, ഇന്റര്‍ മയാമിക്ക് കന്നി ലീഗ്‌സ് കപ്പ്

ന്യൂയോര്‍ക്ക്: അമേരിക്കല്‍ ലീഗ്സ് കപ്പില്‍ സൂപ്പര്‍ താരം ലയണല്‍ മെസ്സിയുടെ കരുത്തില്‍ ഇന്റര്‍ മയാമി കിരീടം ചൂടി. ഫൈനല്‍ പോരാട്ടത്തില്‍ നാഷ് വില്ലയെയാണ് മയാമി പരാജയപ്പെടുത്തിയത്.

മയാമിയുടെ ആദ്യ കിരീട നേട്ടമാണിത്. പെനാല്‍റ്റി ഷൂട്ടൗട്ടിലാണ് (10-9) ഇന്റര്‍ മയാമിയുടെ വിജയം. നിശ്ചിത സമയത്ത് ഇരു ടീമുകളും ഓരോ ഗോള്‍ വീതം നേടി സമനില പിടിച്ചിരുന്നു.

മത്സരത്തിന്റെ 23-ാം മിനിറ്റല്‍ മെസ്സിയുടെ തകര്‍പ്പന്‍ ഗോളോടെയാണ് മിയാമി മുന്നിലെത്തിയത്. 57-ാം മിനിറ്റില്‍ ഫഫ പികൗള്‍ട്ട് നാഷ് വില്ലയ്ക്കായി ഗോള്‍ നേടി. 

മെസി ടൂര്‍ണമെന്റില്‍ ഏഴു മത്സരങ്ങളില്‍ നിന്ന് 10 ഗോളുകള്‍ നേടി. അമേരിക്കയിലെ ആദ്യ ടൂര്‍ണമെന്റില്‍ തന്നെ മെസ്സി കീരീടം സ്വന്തമാക്കി. ഇതോടെ മെസ്സിയുടെ കരിയറിലെ കിരീടനേട്ടം 44 ആയി.