ട്വിസ്റ്റോട് ട്വിസ്റ്റ്, ആന്റി ക്ലൈമാക്‌സ്, രാജസ്ഥാനെ നോ ബോള്‍ തോല്‍പ്പിച്ചു!

ജയ്പൂര്‍: ട്വിസ്റ്റ് നിറഞ്ഞ ആന്റി ക്ലൈമാക്‌സുമായിരുന്നു രാജസ്ഥാന്‍ റോയല്‍സ്-സണ്‍റൈസേഴ്‌സ് ഹൈദരാബാദ് പോരാട്ടം. ആദ്യം ബാറ്റ് ചെയ്ത് രാജസ്ഥാന്‍ 214 റണ്‍സടിച്ചു. കൂറ്റന്‍ സ്‌കോര്‍ പിന്‍തുടരാന്‍ ഹൈദരാബാദിന് കഴിയില്ലെന്നുറപ്പിച്ചു.

അഭിഷേക് ശര്‍മയും അന്‍മോല്‍പ്രീത് സിംഗും ചേര്‍ന്ന് ഓപ്പണിംഗ് വിക്കറ്റില്‍ 5.5 ഓവറില്‍ 51 റണ്‍സടിച്ചു. അന്‍മോല്‍പ്രീതും ഹൈദരാബാദ് 100 കടന്നതിന് പിന്നാലെ അഭിഷേക് ശര്‍മയും സ്‌കോര്‍ 150 കടന്നപ്പോള്‍ രാഹുല്‍ ത്രിപാഠിയും ഹെന്റിച്ച് ക്ലാസനും ക്യാപ്റ്റന്‍ ഏയ്ഡന് മര്‍ക്രവും എല്ലാം മടങ്ങി.

അവസാന രണ്ടോവറില്‍ ജയത്തിലേക്ക് ഹൈദരാബാദിന് വേണ്ടിയിരുന്നത് 41 റണ്‍സായിരുന്നു. നിര്‍ണായക പത്തൊമ്പതാം ഓവര്‍ എറിയാനെത്തിയത് കുല്‍ദീപ് യാദവ് എന്ന ഇടം കൈയന്‍ പേസറും. രണ്ട് പന്തില്‍ മൂന്ന് റണ്‍സുമായി ക്രീസിലുണ്ടായിരുന്നത് ഗ്ലെന്‍ ഫിലിപ്‌സ്.

കുല്‍ദീപിന്റെ ആദ്യ മൂന്ന് പന്തുകളും ഗ്ലെന്‍ ഫിലിപ്‌സ് സിക്‌സിന് പറത്തി. ആദ്യ രണ്ട് പന്തുകളും ഫുള്‍ടോസായിരുന്നെങ്കില്‍ മൂന്നാം പന്ത് ഷോര്‍ട്ട് പിച്ചായിരുന്നു.

നാലാം പന്ത് ബൗണ്ടറി, അഞ്ചാം പന്തില്‍ വീണ്ടും ട്വിസ്റ്റ്. ഫിലിപ്‌സിനെ ഷിമ്രോണ്‍ ഹെറ്റ്‌മെയര്‍ പറന്നുപിടിച്ചു. ഇതോടെ വീണ്ടും ഹൈദരാബാദിന്റെ പ്രതീക്ഷ മങ്ങി. അവസാന പന്തില്‍ മാര്‍ക്കോ ജാന്‍സന്‍ രണ്ട് റണ്‍സെടുത്തതോടെ അവസാന ഓവറില്‍ ഹൈദരാബാദിന് ജയിക്കാന്‍ വേണ്ടിയിരുന്നത് 17 റണ്‍സ്.

സന്ദീപ് ശര്‍മയെ രാജസ്ഥാന്‍ ക്യാപ്റ്റന്‍ സഞ്ജു സാംസണ്‍ പന്തെറിയാന്‍ വിളിച്ചു. ആദ്യ പന്തില്‍ തന്നെ അബ്ദുള്‍ സമദ് നല്‍കിയ അനായാസ ക്യാച്ച് ഒബേദ് മക്കോയ് നിലത്തിട്ടു. ഹൈദരാബാദ് രണ്ട് റണ്‍സ് ഓടിയെടുത്തു.

അടുത്ത പന്തില്‍ സമദിന്റെ സിക്‌സ്. ലോംഗ് ഓണില്‍ ജോ റൂട്ട് പരമാവധി ശ്രമിച്ചെങ്കിലും കൈയില്‍ തട്ടി പന്ത് ബൗണ്ടറി കടന്നു. അടുത്ത മൂന്ന് പന്തില്‍ സന്ദീപ് ശര്‍മ വിട്ടുകൊടുത്തത് നാലു റണ്‍സ്.

ഇതോടെ ജയത്തിലേക്ക് അവസാന പന്തില്‍ വേണ്ടത് അഞ്ച് റണ്‍സ്. സന്ദീപ് ഓഫ് സ്റ്റംപിന് പുറത്തെറിഞ്ഞ പന്തില്‍ സമദിന്റെ ഷോട്ട് നേരെ ലോംഗ് ഓഫില്‍ ജോസ് ബട്ലറുടെ കൈകളിലേക്ക്. രാജസ്ഥാന് നാലു റണ്‍സിന്റെ നാടകീയ ജയം. വിജയച്ചിരിയുമായി സന്ദീപ് ആകാശത്തേക്ക് വിരലുയര്‍ത്തി നില്‍ക്കെ നോ ബോള്‍ സൈറണ്‍ മുഴങ്ങി.

അവിശ്വസനീയതോടെ താരങ്ങള്‍ പരസ്പരം മുഖത്തോട് മുഖം നോക്കി നില്‍ക്കെ സന്ദീപ് എറിഞ്ഞത് വലിയ നോ ബോളെന്ന് റീപ്ലേകളില്‍ വ്യക്തമായി. റണ്ണോടാതിരുന്നതിനാല്‍ ഹൈദരാബാദിന് ഫ്രീ ഹിറ്റായ അവസാന പന്തില്‍ വേണ്ടത് നാലു റണ്‍സ്. വീണ്ടും ഓഫ് സ്റ്റംപിന് പുറത്തെറിഞ്ഞ സന്ദീപിന്റെ പന്തിനെ ബൗളറുടെ തലയ്ക്ക് മുകളിലൂടെ സിക്‌സിന് പറത്തി സമദ് ഹൈദരാബാദിന് സമ്മാനിച്ചത് അവിസ്മരണീയ വിജയം.