'ഇന്റര്‍ മയാമിയില്‍ ചേരാനുള്ള തീരുമാനത്തില്‍ ഉറച്ചുനില്‍ക്കുന്നു.. സന്തോഷകരമായ മാറ്റമാണിത്'

ബാഴ്സലോണ: പിഎസ്ജിയിലെ കരാര്‍ പൂര്‍ത്തിയാക്കിയ ലയണല്‍ മെസി അമേരിക്കന്‍ ക്ലബ് ഇന്റര്‍ മയാമിയിലേക്ക് ചെക്കേറിയത് ഫുട്ബോള്‍ ലോകത്തെ അമ്പരിപ്പിച്ചിരുന്നു.

മെസിയുടെ ഇന്റര്‍ മയാമിയില്‍ ചേരാനുള്ള തീരുമാനം അബദ്ധമായെന്ന തരത്തില്‍ വിലയിരുത്തലുകളും വിമര്‍ശനങ്ങളും ഉയര്‍ന്നിരുന്നു. ഇതിനോടെല്ലാം പ്രതികരിക്കുകയാണ് മെസി.

''ഇന്റര്‍ മയാമിയില്‍ ചേരാനുള്ള തീരുമാനത്തില്‍ ഉറച്ചുനില്‍ക്കുകയാണ്. സന്തോഷകരമായ മാറ്റമാണിത്. പിഎസ്ജിയിലെ കരാര്‍ പൂര്‍ത്തിയായപ്പോള്‍ ബാഴ്സലോണയിലേക്ക് തിരികെ പോകാന്‍ തന്നെയാണ് ആഗ്രഹിച്ചത്.

എന്നാല്‍ ട്രാന്‍സ്ഫര്‍ നീക്കങ്ങളൊന്നും പ്രതീക്ഷിച്ച പോലെയായില്ല.തന്റെ തിരിച്ചുവരവിലൂടെ ബാഴ്സയിലെ നിലവിലെ താരങ്ങള്‍ക്ക് പ്രയാസമുണ്ടാക്കാനും ഇഷ്ടമില്ല.

അതെനിക്ക് നിര്‍ബന്ധമാണ്. ഇന്റര്‍ മയാമിയിലേക്ക് പോകാനുള്ള തീരുമാനം ഉത്തമബോധ്യത്തോടെ എടുത്തതതാണ്. ജീവിതത്തിലെ പ്രധാനപ്പെട്ട തീരുമാനങ്ങളില്‍ ഒന്നാണിത്. സന്തോഷത്തോടെ പുതിയ വെല്ലുവിളി ഏറ്റെടുക്കാന്‍ കാത്തിരിക്കുകയാണ്' മെസി പറഞ്ഞു.

''ലോകകപ്പിലടക്കം മൂന്ന് ഫൈനലില്‍ തോറ്റപ്പോഴും പ്രധാന കിരീടങ്ങളെല്ലാം നേടാനാവുമെന്ന ഉറച്ച വിശ്വാസം ഉണ്ടായിരുന്നു. ലോക ചാംപ്യന്‍മാരായ അര്‍ജന്റീനയ്ക്കൊപ്പം കളിക്കുന്നത് സവിശേഷമായ അനുഭവമാണ്.

ഖത്തര്‍ ലോകകപ്പില്‍ അര്‍ജന്റീന കിരീടം നേടിയില്ലായിരുന്നുവെങ്കില്‍ അന്താരാഷ്ട്ര ഫുട്ബോളില്‍ താനിപ്പോള്‍ ഉണ്ടാവുമായിരുന്നില്ല.'' മെസി കൂട്ടിചേര്‍ത്തു.

" width="100%" height="411px" frameborder="0" allowfullscreen="allowfullscreen">